ಬಾವಿಸಾಂವೊ ಆಯ್ತಾರ್ ಸಾಧಾರಣ್ ಕಾಳ್ ವೊರ್ಸ್B 02-09-12 ಆಯ್ಚೊ ವಿಷಯ್: ಮಿಸಾಂವಾ ಖಾತಿರ್ ಶಿಸಾಂಚಿ ತಯಾರಾಯ್

ಬಾವಿಸಾಂವೊ ಆಯ್ತಾರ್ ಸಾಧಾರಣ್ ಕಾಳ್ ವೊರ್ಸ್B 02-09-12 ಆಯ್ಚೊ ವಿಷಯ್: ಮಿಸಾಂವಾ ಖಾತಿರ್ ಶಿಸಾಂಚಿ ತಯಾರಾಯ್ ಬಾವೆ ಶಾಸನಾಂತ್ಲ್ಯಾ ಬುಕಾಂತ್ಲೆ ಪೊಯ್ಲೆಂ ವಾಚಾಪ್ 4:1-2, 6-8 ಸದಾಂಚೆ ಜಿವಿತ್ ಜಿಂಯೊವ್ಕ್ ಇಸ್ರಾಯೆಲ್ ಪರ್ಜೆಕ್ ಬೂದ್ ಬಾಳ್ ಆನಿಂ ಸಮ್ಜೊಣಿ. ಜಾಕೊಬಾಚಾ ಪತ್ರಾಂ ತ್ಲೆಂ ದುಸ್ರೆಂ ವಾಚಾಪ್ 1:17-18, 21-22, 27 ಸತಾಚಾ ಉತ್ರಾನ್ ದೇವ್ ಆಮ್ಕಾಂ ಜಲ್ಮ್ ದಿತಾ. ಸಾಂ ಮಾರ್ಕು ಚಾ ವಾಂಜೆಲಾಂತ್ಲೊ 7:1-8, 14-15, 21-23 ಮಾಲ್ಗ ಡ್ಯಾಂಚೊ ರಿವಾಜ್ಯೊ ಮುನ್ಶಾಂಕ್ ಮೊಸ್ತ್ ಮ್ಹೆಳಯ್ತಾತ್. ಹ್ಯಾ ಸಂಸಾರಾಂತ್ ಆಮಿಂ ಜಿಯೆತಾನಾ ಆಮಿಂಚ್ ಆಸಾನಾಂವ್, ಬಗಾರ್ ಆಮ್ಚೆ ಸಾಂಗಾತಾ ವಿವಿಧ್ ಧರ್ಮಾಚೊ ಲೊಕ್ ಜಿಯೆತಾ. ತಾಂಚಾ ಧರ್ಮಾಚೊ ಪ್ರಬಾವ್ ಆಮ್ಚೆರ್ ಪೊಡ್ತಾ ತೊ ಖರೊಚ್, ಪೂಣ್ ಆಮಿಂ ಕಶೆಂ ಜಿಯೆಜಯ್ ಮ್ಹುಳೆಂ ಸತ್ ಆಮ್ಕಾಂ ಆಮ್ಚೆಂ ಕೊಶೆಡ್ದ್ ಶಿಕಯ್ತಾ. ಚಡಾವತ್ ಜಾವ್ನ್ ಆಮಿಂ ದುಸ್ರ್ಯಾಂಚಾ ಪ್ರಭಾವಾನ್ ಆಮ್ಚೆಂ ಜಿವನ್ ಮುಕಾರ್ಸುಂಕ್ ಚಿಂತಾಂವ್. ತಶೆಂ ಜಾಲ್ಲ್ಯಾನ್ ಆಮ್ಚೆಂ ಜಿವನ್ ಕೆದಾಳಾರೀ ಸುಖಾಬರಿತ್ ಆಸಾನಾಂ. ಸಕ್ಡಾಂಕ್ ತ್ರಪ್ತ್ ಕರುಂಕ್ ಕೊಣಾಚಾನೀಂ ಸಾದ್ಯ ನಾಂ. ಕಿತ್ಲಿಶಿಂ ನಿಯಮಾಂ ಆಮ್ಕಾಂ ದೊವ್ರಿಜಯ್ ಪೊಡ್ತಾ. ಆನಿಂ ಹಿಂ ನಿಯಮಾಂ ಪಾಳ್ತಾನಾ ಕಿತ್ಲೆಶಾ ಪಾವ್ಟಿಂ ಆಮಿಂ ಚುಕೊನ್ ಪೊಡ್ತಾಂವ್. ತಶೆಂ ಜಾಲ್ಲೆಂ ಆಮಿಂ ಲಿಪೊಂಕ್ ದುಸ್ರಿಂ ನಿಯಮಾಂ ಸೊದ್ತಾಂವ್. ಆಜ್ ಆಮ್ಕಾ ಹ್ಯಾ ಪವಿತ್ರ್ ಮಿಸಾಂತ್ ದೆವಾಚಿಂ ಉತ್ರಾಂ ಆಮ್ಚೆಂ ಜಿವಿತ್ ಸೊಮಾ ಕರ್ನ್ ಸಾರುಂಕ್ ಶಿಕಯ್ತಾತ್. ಯಾ ಸಂಸಾರಾಂತ್ ಆಸ್ತಾನಾ ಆಮಿಂ ಸಾಮಾಜಿಕ್ ಪ್ರಾಣಿಂ ಆನಿಂ ಹ್ಯಾ ಸಮಾಜಿಂತ್ ಜಿಯೆಜಯ್ ಜಾಲ್ಯಾರ್ ಆಮಿಂ ತಾಚಿಂ ನಿಯಮಾಂ ಪಾಳಿಜಯ್. ಹೆಂ ಆಮಿಂ ಲ್ಹಾನ್ ಆಸ್ತಾನಾಂಚ್ ಆಮ್ಕಾ ಶಿಕಯ್ತಾತ್. ಹಿಂ ನಿಯಮಾಂ ಆಮ್ಕಾಂ ಸ್ವತಂತ್ರ್ ಕರ್ಚಾ ಬದ್ಲಾಕ್ ಆಮ್ಕಾಂ ಎಕಾ ಪರಿಧೆ ಭಿತರ್ ಬಾಂದುನ್ ಸೊಡ್ತಾತ್. ಮುನಿಸ್ ಜಲ್ಮಾ ಥಾವ್ನಂಚ್ ಸ್ವತಂತ್ರ್, ತಾಕಾ ಬಾಂದುನ್ ದೊವ್ರುಂಕ್ ಅಸಾದ್ಯ್. ದೆಕುನ್ ಜೆಜು ಯ್ಯಾ ಸಂಸಾರಾಂತ್ ಮುನ್ಶಾಕುಳಾಕ್ ಪಾತ್ಕಾಚಾ ಬಾಂದ್ಪಾಸಾಂತ್ಲೊ ಸೋಡೊಂಕ್ ಆಯ್ಲೊ. ತೊ ಆಯ್ಲ್ಯಾ ವೆಳಾರ್ ತಾಣೆಂಯ್ ಪೊಳೆಲೆಂ ಫಾರಿಜೆವ್ ಲೊಕಾಕ್ ಕಶೆಂ ತಾಂಚಾ ನಿಯಮಾನಿಂ ಬಾಂದುನ್ ದೊವೊರ್ತೆಲೆ. ಹಿಂಚ್ ಸತಾಂ ಆಮ್ಕಾ ಆಯ್ಚಾ ತಿನೀಂ ವಾಚ್ಪಾನಿಂ ವಾಚುಂಕ್ ಮೆಳ್ತಾತ್. ಪೊಯ್ಲೆಂ ವಾಚಾಪ್ ಆಮ್ಕಾಂ ಬಾವೆ ಶಾಸನಾಂಚಾ ಬುಕಾಂತ್ಲೆಮ್ ಜಿವಿತಾಚೆಂ ನಿಯಮ್ ದಾಕಯ್ತಾ. ಇಸ್ರಾಯೆಲ್ ಲೊಕ್ ಮೊಸ್ತ್ ಥರಾಂಚಾ ಲೊಕಾ ಸಾಂಗಾತಾ ಜಿಯೆತೊಲೊ. ತಾಂಕಾ ತಾಂಣಿ ಯೆಹೊವಾಚಾ ನಿಯಮಾಖಾಲ್ ಚಲಾಜಯ್ ಮ್ಹುಣ್ ದೆವಾನಂಚ್ ತಾಂಚೆ ಸಾಂಗಾತಾ ಖರಾರ್ ಕೆಲ್ಲೆಂ. ಕಿತ್ಲೆಶಾ ಪಾವ್ಟಿಂ ವಿವಿಧ್ ಲೊಕಾಚಾ ಪ್ರಭಾವಾನ್ ತೆ ದೆವಾಚಾ ನಿಯಮಾಂ ಥಾಂವ್ನ್ ಆಪ್ಣಾಂಕಚ್ ಸುಟೊಂಕ್ ಪೆಚಾಡ್ತೆಲೆ. ಹೊ ಪ್ರಭಾವ್ ತಾಂಚೆರ್ ಪೊಡಾನಾಂಶೆಂ ಸಬಾರ್ ಲೊಕ್ ತಾಂಕಾ ವಿವಿಧ್ ನಿಯಮಾನಿಂ ಬಾಂದ್ತೆಲೆ. ಹೆಂ ತಾಂಕಾ ಅನಿಕೀ ಧೆದೆಸ್ಪೊರ್ ಕರ್ತಾನಾ ತೆ ಪೊರ್ತ್ಯಾನ್ ಯೆಹೊವಾಕ್ ಹಾಕ್ ಮಾರ್ತಾಲೆ. ಆಮಿಂ ಪೊಳೆತಾಂವ್ ದುಸ್ರ್ಯಾ ವಾಚ್ಪಾಂತ್ ಜಾಕೊಬ್ ತಾಚಾ ಕ್ರಿಸ್ತಾಂವಾಕ್ ಸಾಂಗ್ತಾ ತೆ ಸತಾಚಾ ದೆವಾ ಥಾವ್ನ್ ಉಬ್ಜಾಲ್ಲೆ ಮ್ಹುಣ್. ಹೆಂ ಸತ್ ಸಮ್ಜಾ ತಚ್ ಹರೆಕ್ಲ್ಲ್ಯಾನ್ ದೆವಾಚಿ ಚಾಕ್ರಿ ಕರುಂಕ್ ದಿಸಾಂದೀಸ್ ಪ್ರಯತನ್ ಕರ್ತೆ ರಾವಾಜಯ್. ಜೆಜುಚೆ ಶಿಸ್ ಜೆಜು ಸಾಂಗಾತಾ ಆಸ್ತಾನಾ ತೆ ಜೆಜುಚಾ ಶಿಕೊಣೆ ಬರಾಬರ್ ಚಲೊಂಕ್ ಪ್ರಯತನ್ ಕರ್ತಾನಾ ಫಾರಿಜೆವ್ ತೆಂ ಪೊಳೊನ್ ತಾಂಕಾ ಸಾಂಗ್ತೆಲೆ. ಕಿತ್ಯಾಕ್ ತುಮಿಂ ರಿತಿ ನಿಯಮಾಂ ಪಾಳಿನಾಂತ್? ತವೊಳ್ ಜೆಜು ತಾಂಕಾ ಪ್ರತಿ ಜವಾಬ್ ದೀವ್ನ್ ಸಾಂಗ್ತಾ. ಜೆಂ ಭಾಯ್ರ್ ಥಾವ್ನ್ ಭಿತರ್ ವೆತಾ ತೆಂ ಮ್ಹುನ್ಶಾಕ್ ಬುರ್ಶೆಂ ಕರಿನಾ. ಬಗಾರ್ ಜೆಂ ಭಿತರ್ ಥಾಂವ್ನ್ ಭಾಯ್ರ್ ಎತಾ ತೆಂಚ್ ಮುನ್ಶಾಕ್ ಅನಿತಳ್ ಕರ್ತಾ. ತೊ ಸಾಂಗ್ತಾ ಭಿತರ್ ಥಾವ್ನ್ ವಿವಿಧ್ ಪ್ರಕಾರಾಚಿಂ ಪಾತ್ಕಾಂ ಮುನ್ಶಾ ಥಂಯ್ ಉಬ್ಜಾತಾತ್ ಆಮ್ಚಾಚ್ ಭಾರತಾಂತ್ ಕಿತ್ಲಿಶಿಂ ಧರ್ಮಾಂ ಆಸಾತ್. ಆಮಿಂ ಆಮ್ಚಾ ಆಸ್ ಪಾಸ್ ಜಿಯೆತಾನಾ ಪೊಳೆ ತಾಂವ್ ಲೊಕ್ ತಾಂಚಾ ಘರಾನಿ ಎಕಾ ಥರಾನ್ ಜಿಯೆತಾತ್ ಭಾಯ್ಲ್ಯಾ ಲೊಕಾ ಮುಕಾರ್ ಎಕಾ ಥರಾನ್. ಅಶೆಂ ಜಾಲ್ಲ್ಯಾನ್ ಆಮ್ಚೆಂ ಜಿವನ್ ವಿಭಾಜಿತ್ ಜಾಲಾಂ. ದೆಕುನಂಚ್ ಕಿತ್ಲೆಶೆ ಜಣ್ ಹ್ಯಾ ದೆಶಾ ಥಾವ್ನ್ ಭ್ರಷ್ಟಾಚಾರ್ ಪೊಯ್ಸ್ ಕರುಂಕ್ ಚಿಂತಾತ್. ಪೂಣ್ ತಾಂಚಾನ್ ಹೆಂ ಕರುಂಕ್ ಜಾಯ್ನಾ. ಕಿತ್ಯಾಕ್ ನಯ್ತಿಕ್ ಬೋಳ್ ಕೊಣಾ ಥಂಯ್ ಆಸಾ? ಸಕ್ಕಡ್ ಜಾಣಾಂತ್ ಅಸಲೆಂ ಅಸತ್ ಪೊಯ್ಸ್ ಕರುಂಕ್ ಆಮ್ಚೆ ಥಂಯ್ ನ್ಯಾಯ್ ಆನಿಂ ದೆವಾಚಿ ಖುಶಿ ಕರ್ಚೆಂ ನಯ್ತಿಕ್ ಬೋಳ್ ಜಾಯ್ಜಯ್. ಆಮಿಂ ಕ್ರಿಸ್ತಾಂವ್ ಜೆಜುಚೆ ಶಿಸ್ ತಾಚಾ ಶಿಕೊಣೆ ಪ್ರಮಾಣೆಂ ಚಲೊಂಕ್ ಪ್ರಯತನ್ ಕರ್ತಾನಾ ದೆವಾಚಿ ಖುಶಿ ಕರುಂಕ್ ಆಮ್ಕಾಂ ತಾಚಾಚ್ ಪ್ರೆರಣಾನ್ ಬೋಳ್ ಮೆಳ್ತಾ. ಆಮಿಂ ಆಮ್ಚಾ ಲಾಗಿಂ ಆಸ್ಚಾ ಲೊಕಾ ಸಾಂಗಾತಾ ಜಿಯೆತಾನಾ ಆಮ್ಚಾ ಕೊಶೆಡ್ದಾಚಾ ಆವಾಜಾಕ್ ಆಮಿಂ ಜಾಪ್ ದೀಂವ್ಕ್ ಶಿಕಾಜಯ್. ಆಜ್ ಕೋಣ್ ಕೊಶೆಡ್ದಾಕ್ ವೊಳ್ಕಾತಾ ತೊಜ್ ಹ್ಯಾ ಸಂಸಾರಾಂತ್ ಜಿವಿತ್ ಸಾರುಂಕ್ ಬೊಳಾದಿಕ್. ನಾಂ ಜಾಲ್ಯಾರ್ ಆಮಿಂ ಕಿತ್ಲಿಂಯ್ ಮಿಸಾಂ ಆಯ್ಕೊವೆತ್, ಕಿತ್ಲಿಂಯ್ ಕುಮ್ಸಾರಾಂ ಜಾವ್ಯೆತ್ ದೆವಾಚಿ ಖುಶಿ ಕರುಂಕ್ ಆಮ್ಕಾಂ ಬೋಳ್ ತವೊಳಚ್ ಮೆಳ್ತಾ ಕೆದಾಳಾ ಪೊಳಯ್ ಆಮಿಂ ಆಮ್ಚೆಂ ಕೊಶೆಡ್ದ್ ಶುದ್ಧ್ ಕರ್ತಾಂವ್. ಆಮ್ಚಾ ಕೊಶೆಡ್ದಾಚೊ ಆವಾಜ್ ದೆವಾಚಾ ಪ್ರೆರಣಾಚೊ ಆವಾಜ್. ದೆಕುನ್ ಆಮ್ಕಾಂ ಆಜ್ ಹ್ಯಾ ಪವಿತ್ರ್ ಮಿಸಾಂತ್ ವಾಂಟೊ ಘೆಂವ್ಚೆಂ ಭಾಗ್ ದೆವಾನ್ ದಿಲಾಂ ಆಮ್ಕಾಂ ಮೆಳೆಲ್ಲ್ಯಾ ಹ್ಯಾ ಸಂದರ್ಭಾಕ್ ಆಮಿಂ ದೆವಾಕ್ ಅರ್ಗಾಂ ದಿವ್ಯಾಂ. ಹೊ ವೇಳ್ ಆಮ್ಕಾಂ ದೆವಾಚಾ ಕುರ್ಪೆನ್ ಭೊರುಂದಿ. ತುಮ್ಚಾ ಮೊಗಾಚೊ ಬಾಪ್ ಜುಜೆ ವಾಸ್ ಎಸ್.ವಿ.ಡಿ.