ಅದ್ವೆಂತಾಚೊ ತಿಸ್ರೊ ಐತಾರ್ vorse A 2013

ಅದ್ವೆಂತಾಚೊ ತಿಸ್ರೊ ಐತಾರ್ ವೊರ್ಸ್ A 2013 ವಿಷಯ್: “ಸೊಸ್ಣಿಕಾಯ್” ಭಾವಾಡ್ಯಾಂಚೊ ಗಾಯ್ಡ್ ಜುಂವಾವ್ ಬಾವ್ತಿಸ್ತ್. ಇಸಾಯಿಯಾ ಪ್ರೊಫೆತಾಚಾ ಪುಸ್ತಕಾಂತ್ಲೆಂ ಪೊಯ್ಲೆಂ ವಾಚಾಪ್: 35:1-6 ಜೆರುಜಾಲೆಮಾಂತ್ ಸುಟ್ಕಾ ಮೆಳ್ತಚ್ ಸಕ್ಕಡ್ ಸಂತೊಸಾನ್ ಉಡ್ಕ್ಯೊ ಮಾರ್ತೆಲೆ. ಜಾಕೊಪಾಚಾ ಪತ್ರಾಂತ್ಲೆ ದುಸ್ರೆಂ ವಾಚಾಪ್: 5:7-10 ಜಾಕೊಪ್ ಭಾವಾಡ್ತ್ಯಾಂಕ್ ಸೊಸ್ಣಿಕಾಯೆಚಿ ವೊಪಾರ್ ಸಾಂಗ್ತಾ. ಸಾಂ ಮಾತೆವಾಚಾ ಪುಸ್ತಕಾಂತ್ಲೊ ವಾಂಜೆಲ್: 11:2-11ಜೆಜು ಸಿಸಾಂಕ್ ಜುಂವಾವ್ ಬಾವ್ತಿಸ್ತಾಚಿ ವೊಡ್ವಿಕ್ ಸಾಂಗ್ತಾ. ಆದ್ವೆಂತಾಚೊ ತಿಸ್ರೊ ಆಯ್ತಾರ್ ಭಾವಾಡ್ಯಾಂಕ್ ಜೆಜುಚಾ ಎಣ್ಯಾಂ ವಿಶೆಂತ್ ವೇಳ್ ಲಾಗಿಂ ಪಾವಲ್ಲಿ ಖಬೊರ್ ದಿತಾ.. ಹೊ ಆಯ್ತಾರ್ ಆಮ್ಕಾ ಜೆಜುಚಾ ಎಣ್ಯಾಂಚಿ ಬೊರಿ ಖಬೊರ್ ದೀವ್ನ್ ಸಂತೊಸ್ ಪಾವೊಂಕ್ ಸಾಂಗ್ತಾ.. ಆದ್ವೆಂತಾಚಾ ತಿಸ್ರ್ಯಾ ಆಯ್ತಾರಾ ಇಗೊರ್ಜಮಾತಾ ಆಮ್ಕಾಂ ಸೊಸ್ಣಿಕಾಯ್, ನ್ಯಾಯ್,ಮಾಯಾಮೋಗ್, ಉದಾರ್ಪೊಣ್, ಖಾಲ್ತೆಪೋಣ್, ಆನಿಂ ಕಾಕುಳ್ತಿಚೆ ಗೂಣ್ ಚಡೋಂಕ್ ಸಾಂಗ್ತಾ. ಜಿವನಾಂತ್ ಅಸಲೆ ಗೂಣ್ ಚಡೊಂಚೆ ಕಾಮ್ ಕಶ್ಟಾಂಚೆ.. ಜಿವನಾಂತ್ ಹೆಂ ಪ್ರಯತನ್ ಕರ್ತಾನಾ ಮೊಸ್ತ್ ಅಡ್ಚಣ್ಯೊ ಎತಾತ್. ಅಸಲ್ಯಾ ಸಂದರ್ಬಾರ್ ಆಮಿಂ ಬೊರ್ಯೊ ಕರ್ನ್ಯೊ ಕರ್ಚೆಂ ಸೊಡ್ಚೆಂ ಆಸ್ತಾ.. ಆಮ್ಚಾ ಜಿವನಾಂತ್ ತಳ್ನ್ಯೊ ಎವ್ನ್ ಆಮಿಂ ನಿರಾಸ್ ಜಾವ್ನ್ ಆಮಿಂ ಬೊರೆಂ ಕಾಮ್ ಸೊಡ್ನ್ ಸೊಡ್ಚೆಂ ಆಸ್ತಾ. ಹೆಂ ಕರುಂ ನಜೊ ಮ್ಹುಣ್ ಇಗರ್ಜ್ ಮಾತಾ ಆಮ್ಕಾಂ ಪ್ರೊತ್ಸಾಹಿತ್ ಕರುಂಕ್ ಆಜ್ ತಿನೀಂ ವಾಚ್ಪಾನಿಂ ಸಾಂಗ್ತಾ. ಹರೆಕಾ ಭಾವಾಡ್ತ್ಯಾಕ್ ಚುರುಕ್ ಜಾವ್ನ್ ಆಪ್ಲ್ಯಾ ಜಿವನಾಂತ್ ಬೊರೆಂ ಕರಾ ಮುಣ್ ಕಳಯ್ತಾತ್. ಭಾಯ್ಲ್ಯಾ ರಾಟಾ ವೊಳಿನಿ ಭಾಯ್ಲ್ಯಾ ಆಮ್ಚಾ ಸೆಜ್ ಸಾಂಬಾರಾಚಾ ಪ್ರಭಾವಾನಿ ಆಮಿಂ ಬೊರಿಂ ಕಾಮಾ ಕರ್ಚಿಂ ಸೊಡುಂಕ್ ನಜೊ ಮುಣ್ತಾ ಪವಿತ್ರ್ ಪುಸ್ತಕ್. ದೇವ್ ಖಂಚಾ ರಿತಿರ್ ಪೊರ್ತ್ಯನ್ ಪೊರ್ತ್ಯಾನ್ ಜುದೆವ್ ಲೊಕಾಕ್ ಸೊದುನ್ ಎವ್ನ್ ತಾಣಿಂ ಕೆಲ್ಲ್ಯೊ ಚುಕಿ ಭೊಗ್ಸುನ್ ತಾಂಕಾ ಪಾಟಿಂ ಪೊರ್ತೊಂಕ್ ಸಾಂಗ್ತಾ. ಅಶೆಂ ದೇವ್ ತಾಂಚಾ ಹರೆಕಾ ದಿಸಾಚಾ ಕಾರ್ಯಾನಿಂ ಪ್ರವೆಷ್ ಕರ್ನ್ ತಾಂಕಾ ಆಪ್ಲೊ ಮೋಗ್ ದಾಕಯ್ತಾ. ದೇವ್ ತಾಂಕಾ ತಾಚಾ ಸುಟ್ಕೆ ಕಾರ್ಯಾಂತ್ ಭಾಗಿದಾರ್ ಜಾಂವ್ಕ್ ಆಪಯ್ತಾ. ಹೆಂ ಯೊಜನ್ ತೊ ಸದಾಂಚ್ ತಾಚಾ ಲೊಕಾ ಸಾಂಗಾತಾ ಕರುಂಕ್ ಅಪೆಕ್ಷಿತಾ. ಪ್ರವಾದಿ ಇಸಾಯಿಯಾಚಾ ಬುಕಾಂತ್ ತೊ ಲೊಕಾಚೊ ಮೊಗ್ ಪ್ರಕಟ್ ಕರ್ತಾ. ತಾಂಚಾ ಕುಡಿನಿ ಜಾಲ್ಲ್ಯೊ ಉಣೆಪೊಣಾಂ ತೊ ಪೂರ್ಣ್ ಕರುಂಕ್ ಅತ್ರೆಗ್ತಾ ಹೆಂ ತೊ ಪ್ರಗಟ್ ಕರ್ತಾ. ಅಚರ್ಯೆಂ ಕರ್ನ್ ತೊ ತಾಂಕಾ ಗೂಣ್ ಕರ್ತಾ. ತಾಂಚೆ ಕುರ್ಡೆಂ ಪೊಣ್ ಗೂಣ್ ಕರ್ನ್ ತಾಂಕಾ ನೊವಿ ದೀಶ್ಟ್ ದಿತಾ. ಜೆರುಸಾಲೆಮಾಚಾ ಲೊಕಾಕ್ ಪೂರ್ಣ್ ತಾ ದೀವ್ನ್ ತಾಂಕಾ ತೊ ಪರಿಪೂರ್ಣ್ ಕರುಂಕ್ ಪೆಚಾಡ್ತಾ. ತಾಂಚೆ ಮೊಡ್ಕೊರ್ ವಿಶ್ವೆ ತೊ ಗೂಣ್ ಕರ್ನ್ ತಾಂಕಾ ನೊಂವೆ ಜಿವಿತ್ ದಿತಾ.. ಹೆಂ ಜಾಂವ್ಕ ಕಾರಾಣ್ ದೆವಾಚೊ ತಾಚಾ ವಿಂಚುನ್ ಕಾಡ್ಲೆಲ್ಯಾ ಪರ್ಜೆಚೆರ್ ತಾಚೊ ಅಗಣಿತ್ ಮೋಗ್. ಆಮಿಂ ಪೊರ್ತ್ಯಾನ್ ಪೊರ್ತ್ಯಾನ್ ಪಾತಾಕ್ ಆದಾರ್ನ್ ಆಮ್ಚೆಂ ಜಿವಿತ್ ಕಾಳೊಕಾನ್ ಭೊರ್ಲ್ಯಾರೀ ತೊ ಆಮ್ಕಾಂ ಕೆದಿಂಚ್ ಸೊಡಿಸೊನಾಂ. ಸಾಂ ಜಾಕೊಪ್ ಆಮ್ಕಾಂ ಎಕಾ ಶೆತ್ಕಾರಾಚಿ ವೊಪಾರ್ ಸಾಂಗ್ತಾ. ಕಶೆಂ ಶೆತ್ಕಾರ್ ತಾಚೊ ಗಾದೊ ತಯಾರ್ ಕರ್ತಾ, ತಾಂತುಂ ಬೀಂ ವೊಂಪ್ತಾ ಆನಿ ಸೊಸ್ಣಿಕಾಯೆನ್ ತೆಂ ಪಿಕ್ತಾ ವರೆಗ್ ರಾಕೊನ್ ರಾವ್ತಾ....... ಹೆಂ ಆಮಿಂ ಆಮ್ಚಾ ಪರಿಸರಾನಿಂ ಪೊಳೆಲಾಂ. ಪೂಣ್ ಆಧುನಿಕ್ ಕಾಲಾರ್ ದಿಸಾ ಕುಲಿಚಾ ಮ್ಹಾರ್ಗಾಯೆಕ್ ಲಾಗೊನ್ ಲೊಕಾನಿಂ ಗಾದೆ ಬೆಸಾಯ್ ಕರ್ಚೆಂ ಉಣೆಂ ಕೆಲಾಂ. ಜಾಲ್ಯಾರೀ ಜಾಕೊಪಾಚಿ ವೊಪಾರ್ ಆಜೀ ಆಮ್ಚಾ ಜಿವನಾಂತ್ ಸೊಸ್ಣಿಕಾಯ್ ಚಡೊಂಕ್ ಲಾಗು ಕರ್ಯೆತಾ. ಆಯ್ಚಾ ಸಂದರ್ಭಾರ್ ಹೆಂ ಆಮಿಂ ಚಿಂತುನ್ ಪೊಳೆಜಯ್. ಆಯ್ಚೊ ವಾಂಜೆಲ್ ಆಮ್ಕಾಂ ಜೆಜು ಅಶೆಂ ಲೊಕಾ ಮುಕಾರ್ ಎತಾ? ತೆ ಕಶೆಂ ತಾಚಿ ವೊಳೊಕ್ ಜಾಯ್ನಾಸ್ತಾನಾ ರಾವ್ತಾತ್? ಹೆಂ ಶಿಕೊಂಕ್ ಪ್ರಯತನ್ ಕರ್ತಾ. ಜುವಾಂವ್ ಬಾವ್ತಿಸ್ತ್ ಜಯ್ಲಾಂತ್ ಆಸ್ತಾನಾ ಆಯ್ಕಾತಾ ಜೆಜು ಅಚರ್ಯಾಂ ಕರ್ತಾ. ಲೊಕಾಕ್ ಶಿಕಯ್ತಾ, ಲೊಕ್ ತಾಚಾ ಪಾಟಿಂ ಚಲ್ತಾ........ ತ್ಯಾ ವೆಳಾರ್ ಸಡ್ವೊಣ್ದಾರ್ ಎಂವ್ಚೆ ವಿಶೆಂತ್ ಸಕ್ಕಡ್ ರಾಕೊನ್ ಆಸ್ಲೆಲೆ. ಸಡ್ವೊಣ್ದಾರ್ ಕಸೊ ಆಸ್ಯೆತಾ ತೆಂ ತೆ ಅಶೆಂ ಚಿಂತಾಲೆ:. 1. ಸಡ್ವೊಣ್ದಾರ್ ಎಕ್ ಮಹಾನ್ ರಾಯ್ ಕುಳಿಯೆಂತ್ಲೊ ರಾಯ್. 2. ಸಡ್ವೊಣ್ದಾರ್ ದಾವಿದ್ ರಾಯಾ ಚಾನೀ ವೊಡ್ ಅನಿಂ ಪೊದ್ವೆದಾರ್. 3. ಸಡ್ವೊಣ್ದಾರ್ ಜೆರುಸಾಲೆಂಮಾಂಚೆ ಬೊಳ್ಕೆಂ ಸಗ್ಳ್ಯಾನ್ ಪಾಟಿಂ ಹಾಡ್ತಾಲೊ.. ಪೂಣ್ ಜೆಜು ಎವ್ನ್ ಲೊಕಾಕ್ ಗೂಣ್ ಕರುಂಕ್ ಲಾಗ್ಲೊ.. ತೊ ಪಾತ್ಕ್ಯಾಂ ಸಾಂಗಾತಾ ಬೊಸೊನ್ ಜೆವ್ತಾಲೊ.. ತೊ ಎಕಾ ಜಾಗ್ಯಾ ಥಾವ್ನ್ ದುಸ್ರ್ಯಾ ಜಾಗ್ಯಾಕ್ ಚಲೊನ್ ವೆತಾಲೊ. ಲೊಕ್ ಹಾರಿಹಾರಿನಿ ತಾಚೊ ಪಾಟ್ಲಾವ್ ಕರ್ತಾಲೆ ಹೆಂ ಪೊಳೊನ್ ಜುಂವಾವ್ ಬಾವ್ತಿಸ್ತ್ ತಾಚಾ ಸಿಸಾಂಕ್ ಜೆಜುಲಾಗಿಂ ಧಾಡ್ತಾ. ಜೆಜು ತಾಂಕಾ ಶೀದಾ ಜಾಪ್ ದೀನಾಂ. ಜೆಜು ಮ್ಹುಣ್ತಾ ತುಮಿಂ ಅಚರ್ಯೆಂ ಪೊಳೊನ್ ಜುಂವಾವ್ಕ್ ತುಮ್ಚಿ ಗವಾಯ್ ದಿಯಾ.. ಜೆಜು ಜುಂವಾಂವ್ಚಿ ಹೊಡ್ವಿಕ್ ತಾಂಕಾ ಕಳಯ್ತಾ.. ಜೆಜು ಜುಂವಾಂವ್ಕ್ ಸಮೆಸ್ತ್ ಪ್ರವಾದ್ಯಾಂಚೊ ಪ್ರವಾದಿ ಮ್ಹುಣ್ ವೊಳ್ಕಾತಾ.. ಜೆಜು ಪೊರ್ನ್ಯಾ ಸೊಲ್ಲ್ಯಾಂತ್ಲೆ ವಾಚುನ್ ತಾಂಕಾ ಜುಂವಾಂವ್ ವಿಶೆಂತ್ ಕಳಯ್ತಾ. ತೊ ಸಡ್ವೊಣ್ದಾರಾಚೊ "ತಾಳೊ" ಮುಣ್ ತಾಕಾ ಆಪಯ್ತಾ. ಆಮಿಂ ಆದ್ವೆಂತಾಂತ್ ಮಿಸಾಕ್ ವೆತಾಂವ್. ಶೆರ್ಮಾಂವ್ ಆಯ್ಕಾ ತಾಂವ್. ಜೆಜುಕ್ ಆಮಿಂ ವೊಳ್ಕೊಂಕ್ ಪ್ರಯತನ್ ಕರ್ತಾನಾ. ಜೆಜು ಆಮ್ಚೆ ಲಾಗಿಂ ಉಲಯ್ತಾ, ತಾಚೊ ತಾಳೊ ಆಮಿಂ ಆಯ್ಲೊವ್ಯಾಂ. ತಾಕಾ ಮೆಳಲ್ಲಿ ಗವಾಯ್ ಆಮಿಂ ಜಾಂವ್ಯಾಂ ತುಮ್ಚಾ ಮೊಗಾಚೊ ದೆಯ್ವಿಕ್ ಸೊಬ್ದಾಚೊ ಸಾಂದೊ ಬಾಪ್ ಜುಜೆ ವಾಸ್. ಎಸ್.ವಿ.ಡಿ.