kannadalipinth adventaco chowtho aithaar 2013

ಆದ್ವೆಂತಾಚೊ ಚೊವ್ತೊ ಆಯ್ತಾರ್ ವೊರ್ಸ್ A 2013 ವಿಷಯ್: "ಹಾಂವ್ ಸೊಮಿಯಾಚಿ ಚರಣದಾಸಿ" ಇಸಾಯಿಯಾ ಪ್ರವಾದಿಚಾ ಪುಸ್ತಕಾಂತ್ಲೆಂ ಪೊಯ್ಲೆಂ ವಾಚಾಪ್: 7:10-14 ಸೊಮಿ ಆಮ್ಚೆ ಸಾಂಗಾತಾ "ಇಮ್ಮಾನುಎಯೆಲ್". ಸಾಂ ಪಾವ್ಲುನ್ ರೊಮಾ ಗಾರಾಂಕ್ ಬೊರಯ್ಲ್ಯಾ ಪತ್ರಾಂತ್ಲೆ ದುಸ್ರೆಂ ವಾಚಾಪ್ 1:1-7 ಕುರ್ಪಾ ಆನಿಂ ಸಮಾದಾನ್ ಆಮ್ಕಾಂ ಜೆಜು ಥಾವ್ನ್ ಲಾಬ್ತಾ. ಸಾಂ ಮಾತೆವಾಚಾ ಪುಸ್ತಕಾಂತ್ಲೊ ವಾಂಜೆಲ್1:18-24 ಮೊರಿಯೆಚಿ ಖಾಲ್ತಿಮಾನ್ ಆಮ್ಕಾಂ "ಇಮ್ಮಾನುಯೆಲ್" ದಿತಾ!. ಜೆಜು ಕ್ರೀಸ್ತಾಚಾ ಜಲ್ಮಾಂತ್ "ಪೊರ್ನೊ ಸೊಲ್ಲೊ" ಪೂರ್ಣ್ ಜಾತಾ. ಜೆಜು ಆಮ್ಚೊ ಸಡ್ವೊಣ್ದಾರ್ ಆಮ್ಚಾ ಜಿವಿತಾಂತ್ ಎತಾನಾ ಎಕ್ ನೊವೆಂ ಯುಗ್ ಆಮ್ಚೆ ಥಂಯ್ ಜಲ್ಮ್ ಘೆತಾ. ಆಮ್ಚಾ ಸಡ್ವೊಣೆಂಚಿ ಸರ್ವ ಘಡಿತಾಂ ಆಮ್ಕಾಂ ಆಮ್ಚಾ ಸಡ್ವೊಣೆಚಾ ಇತಿಹಾಸಾಚಾ ಫುಸ್ತಕಾನಿ ಮೆಳ್ತಾ. ಹೆಂ ಸತ್ ಆಮ್ಕಾಂ ಆಯ್ಚಾ ತಿನೀಂ ವಾಚ್ಪಾನಿಂ ಆಯ್ಕೊಂಕ್ ಮೆಳ್ತಾ. ಇತಿಹಾಸಾಂತ್ಲಿ ಸಕ್ಕಡ್ ಘಡಿತಾಂ ಆಮ್ಚಾ ಸಡ್ವೊಣೆಂಚಿ ಕಾಣಿಂ ಸಾಂಗ್ತಾತ್. ಯಾ ಕಾಣಿಂಯೆಂತ್ ದೆವಾಚೊ ಅಪರಿಮಿತ್ ಮೋಗ್ ಮುನ್ಶಾಕುಳಾ ಥಂಯ್ ಆಮ್ಕಾಂ ದಿಷ್ಟಿಕ್ ಪೊಡ್ತಾ. ಯಾ ಕಾಣಿಯೆಚೆ ಪ್ರಮುಖ್ ಪಾತ್ರ್ ತೂಂ ಆನಿಂ ಹಾಂವ್. ತುಕಾ ಆನಿಂ ಮಾಕಾಂ ದೆವಾನ್ ರಚ್ಲೆಂ ಆಮ್ಕಾಂ ತಾಚಾ ಪ್ರತಿರುಪಾಂತ್ ರಚ್ಲೆಂ. ಆಮಿಂ ಹೆಂ ಪ್ರತಿರೂಪ್ ಆಮ್ಚಾ ಅವಿದೆಯ್ಪೊಣಾನ್ ಹೊಗ್ಡಾಯ್ಲೆಂ. ಇಸಾಯಿಯಾ ಪ್ರವಾದಿ ಆಮ್ಕಾಂ ಎಕಾ ಆಂಕ್ವಾರಿಚಾ ಗರ್ಭಾಂತ್ ಜಲ್ಮೊಚಾ ಬಾಳಾಚಿ ಬೊರಿ ಖಬೊರ್ ಹಾಡ್ತಾ. ತಿ ಆಂಕ್ವಾರ್ ಎಕಾ ಚೆರ್ಕ್ಯಾಕ್ ಜಲ್ಮ್ ದಿತೊಲಿ. ತಾಕಾ ತಿ ಇಮ್ಮಾನುಯೆಲ್ ಮುಣ್ ವೊಲಾಯ್ತೆಲಿ. ಇಮಾನುಯೆಲ್ ಮುಳ್ಯಾರ್ "ದೇವ್ ಆಮ್ಚೆ ಸಾಂಗಾತಾ". ಕಸಲೆಂ ಅಚರ್ಯೆಂ!!!!! ಆಂಮಿ ಕಿರ್ಕೊಳ್ ದೆವಾ ಸಾಂಗಾತಾ ಜಿಯೆಂವ್ಕ್ ಫಾವೊ. ಮೊರಿಯೆನ್ ಖಾಲ್ತಿ ಜಾವ್ನ್ ಮ್ಹೊಣ್ತಾನಾಂ" ಹಾಂವ್ ದೆವಾಚಿ ಚರಣ್ ದಾಸಿ" ಹೆಂ ಅಚರ್ಯೆಂ ಸತ್ ಜಾಂವ್ಕ್ ಪಾವ್ಲಾಂ!!!!!! ಮೊರಿ ಆಮ್ಚೆ ಬರಿಂಚ್ ಸಡ್ವೊಣ್ದಾರಾಚಾ ವಾಟ್ ಪೊಳೊನ್ ಆಸ್ಲೆಲಿ. ತಿಕಾ ತಾಚೊ ತಾಳೊ ವೊಳ್ಕೊಂಕ್ ಕಷ್ಟ್ ಜಾಂವ್ಕ್ ನಾಂತ್. ತಿ ದೆವಾಚಿ ಖುಶಿ ಕರುಂಕ್ ಕೆದಾಳಾರೀ ತಯಾರ್ ಆಸ್ತಾಲಿ. ದೆವಾಚೆಂ ನಿರ್ಮೊಣೆಂ ಎತಾನಾ ತಿಕಾ ತೆಂ ಸಮ್ಜೊಂಕ್ ಕಾಂಯ್ ಕಷ್ಟ್ ಜಾಂವ್ಕ್ ನಾಂತ್. ತಿಕಾ ತಿಚಾ ತ್ಯಾ ಖಾಲ್ತಿಮಾನಾಂತ್ ತಿಕಾ ಜಾಂವ್ಚಿ ನಾಲಿಸಾಯ್ ದಿಸ್ತಾಲಿ. ಎಕಾ ಆಂಕ್ವಾರ್ ಆವೊಯ್ಕ್ ಹ್ಯಾ ಸಂಸಾರಾಂತ್ ಜಾಂವ್ಚಿ ನಾಲಿಸಾಯ್ ಭೊಗುಂಕ್ ತಿ ಸದಾಂಚ್ ತಯಾರ್ ಆಸ್ಲೆಲಿ. ಆಮಿಂ ಕ್ರೀಸ್ತಾಚಿಂ ಬಾವ್-ಭಯ್ಣಿಂ. ಆಮಿಂ ಹ್ಯಾ ತೀನ್ ಹಪ್ತ್ಯಾನಿಂ ತಾಚಾ ಎಣ್ಯಾಂಕ್ ಖುಶೆನ್ ರಾಕೊನ್ ರಾವ್ಲ್ಯಾಂವ್. ಆಮ್ಚೆಂ ಹೆಂ ರಾಕೊನ್ ರಾಂವ್ಚೆ ಕಾರ್ಯ್ ಆತಾಂ ಸಂಪೂರ್ಣ್ ಕಾಯೆಕ್ ಪಾವ್ಲಾಂ. ಆಮ್ಚೊ ಸಡ್ವೊಣ್ದಾರ್ ಹ್ಯಾ ಸಂಸಾರಾಂತ್ ಆಯ್ಲಾ. ಆಮಿಂ ಹರೆಕ್ಲ್ಯಾಕ್ ಭಾಗಿ ನತಾಲಾಂ ಫೆಸ್ತ್ ಮಾಗ್ತಾನಾ ಜೆಜು ಆಮ್ಚೆ ಸಾಂಗಾತಾ ಆಸಾ ತೆಂ ಸತ್ ಕಾರ್ಯಾಕ್ ಲಾಗ್ತಾ. ಮೊರಿಯೆ ಬರಿಂ ಆಮಿಂಯ್ ಜೆಜುಕ್ ಆಮ್ಚಾ ಕಾಳ್ಜಾಚಾ ದಾರಾರ್ ಥಿರ್ ಕರ್ನ್ ತಿಚೊ ಪಾಟ್ಲಾವ್ ಕರ್ಯಾಂ. ಜುಜೆ ಚಾ ಜಿವನಾಂತ್, ಮೊರಿಯೆಚಿ ಕಬ್ಲಾತ್ ಎಕ್ ನೊವಿ ಸಮಸ್ಯೆ ಹಾಡ್ತಾ. ಗಾಂವಾತ್ ಸಕ್ಡಾಂಕ್ ಗೊತ್ತಾಸ್ತಾ ಕೊಣಾಕ್ ಕೊಣಾ ಕಡೆಂ ಖರಾರ್ ಜಾಲಾಂ. ಕೊಣಾಂಚೆ ಕಾಜಾರ್ ಕೊಣಾಂಕಡೆಂ ಕೆದಾಳಾ ಜಾತಾ. ಅಶೆಂ ಜುಜೆ ಚಾ ಜಿವಿತಾಂತ್ ಎಕ್ ಆವ್ಚಿತ್ ಘುಂವ್ಡಿ ಎತಾ. ತಾಕಾ ಕಿತೆಂ ಕರ್ಚೆಂ ಮುಳೆಂ ಕಳಾನಾ. ತೊ ಮೊರಿಯೆಕ್ ಲಜ್ ಜಾಯ್ನಾಯೆ ಮ್ಹುಳ್ಯಾ ಕಾರಾಣಾಕ್ ಲಾಗೊನ್ ತಿಕಾ ಗುಪ್ತ್ ರಿತಿರ್ ಸೊಡುಂಕ್ ತಯಾರ್ ಜಾತಾ. ತೆದಾಳಾ ದೆವಾಚೊ ದೂತ್ ತಾಕಾ ಮೆಳೊನ್ ಸಾಂಗ್ತಾ, "ಜುಜೆ ತೂಂ ಮೊರಿಯೆಕ್ ತುಜಿ ಪೊತಿಣ್ ಕರ್ನ್ ಘೆಂವ್ಕ್ ಭಿಯೆನಾಕಾ. ತಿಚೆ ಥಂಯ್ ಆಸಾ ತೊ ದೆವಾಚೊ ಪೂತ್ ದೆವಾಚಾ ಸ್ಪಿರಿತಾನ್ ಜಲ್ಮಾತಾ. ತಾಕಾ ತೂಂ ’ಇಮ್ಮಾನುಎಲ್’ ಮುಣ್ ಆಪೊಯ್. " ಜುಜೆ ಆನಿ ಮೊರಿ ಆಮ್ಕಾಂ ಎಕ್ ದೇಕ್ ಜಾಲಿಂ. ಸಬಾರ್ ಪಾವ್ಟಿಂ ಸಂಸಾರಾಚಾ ಭಿಯಾನ್ ಆಮಿಂ ಆಮ್ಚಾ ಭಾವಾಡ್ತಾಚೊ ಸಮಾ ಪಾಟ್ಲಾವ್ ಕರಿನಾಂ. ಜುಜೆ ಆನಿ ಮೊರಿ ಆಮ್ಕಾಂ ಆಮಿಂ ದೆವಾಚಿ ಖುಶಿ ಕಶಿ ಕರಿಜಯ್ ಮ್ಹುಣ್ ಶಿಕಯ್ತಾತ್. ತಾಂಚೊ ದೆವಾಚೆರ್ ಭರ್ವೊಸೊ ಆಮ್ಕಾಂ ಎಕ್ ಬೊರಿ ವಾಟ್ ಜಾಂವ್ದಿ. ಆದ್ವೆಂತಾಚೊ ಚೊವ್ತೊ ಆಯ್ತಾರ್ ಆಮ್ಕಾಂ ದೆವಾಚಾ ಖುಶೆಕ್ ಪಾಳೊ ದೀಂವ್ಕ್ ಶಿಕಯ್ತಾ. ಆಮ್ಚೊ ಭಾವಾಡ್ತ್ ಥಿರ್ ಕರ್ನ್ ಆಮಿಂ ಜೆಜುಚೆ ಖರೆ ಶಿಸ್ ಜಾಂವ್ಯಾ. ಹ್ಯಾ ಪಾವ್ಟಿಂ ಆಮಿಂ ನತಾಲಾಂ ಫೆಸ್ತ್ ಆಚರ್ಸಿತಾನಾಂ ತಾಚೊ ಖರೊ ಅರ್ಥ್ ಸಮ್ಜೊನ್ ಆಮ್ಚಾ ಸಡ್ವೊಣೆಚೊ ಆಮಿಂ ಅನ್ಭವ್ ಕರ್ಯಾಂ. ಸಡ್ವೊಣೆಚೊ ಮಿಸ್ತೆರ್ ಆಮ್ಕಾಂ ಸಡ್ವೊಣೆಚೊ ಅರ್ಥ್ ಸೊಮಾ ಸಮ್ಜೊಂಕ್ ಎಕ್ ವೇಳ್ ಜಾಂವ್ದಿ. ಅಶೆಂ ಹೆಂ ಸತ್ ಆಮ್ಕಾಂ ದೆವಾ ಥಂಯ್ ವೊಡುಂದಿ. ಅಶೆಂ ಆಮಿಂ ಹರೆಕಾ ಮಿಸಾಂತ್ ಜೆಜುಕ್ ಸೆವ್ನ್ ತಾಚಾ ಮೊಗಾಚಾ ಘುರ್ತಾ ಚೊ ಸೊಮಾ ಅರ್ಥ್ ಸಮ್ಜೊನ್ ಘೆವ್ಯಾಂ. ತುಮ್ಚಾ ಮೊಗಾಚೊ ದೆಯ್ವಿಕ್ ಸೊಬ್ದಾಚೊ ಸಾಂದೊ ಬಾಪ್ ಜುಜೆ ವಾಸ್ ಎಸ್.ವಿ.ಡಿ.