pracitaco kaaL dusro aithar vorse A vishay: misavanci tayarai 16-03-14

ಪ್ರಾಚಿತಾಚೊ ಕಾಳ್ ದುಸ್ರೊ ಆಯ್ತಾರ್ ವೊರ್ಸ್ A ವಿಷಯ್: ಮಿಸಾಂವಾಚಿ ತಯಾರಾಯ್. 16-03-2014 ಉತ್ಪತ್ತಿ ಗ್ರಂಥಾಂತ್ಲೆ ಪೊಯ್ಲೆಂ ವಾಚಾಪ್ 12:1-4 ಅಬ್ರಾಮಾಚೆಂ ಆಪೊಣೆಂ. ಸಾಂ ಪಾವ್ಲಾಚೆಂ ತಿಮೊಥಿಕ್ ಬೊರಯ್ಲ್ಯಾ ಪತ್ರಾಂತ್ಲೆ ದುಸ್ರೆಂ ವಾಚಾಪ್: 1:8b-10. ನಿಯಮ್ ಶಾಸ್ತ್ರಾಚೊ ಶೆವೊಟ್. ಸಾಂ ಮಾಥೆವಾಚ್ಯಾ ವಾಂಜೆಲಾಂತ್ಲೊ17:1-9. ಜೆಜು ರುಪಾಂತರ್ ಜಾತಾ. ಪ್ರಾಚಿತಾಚೊ ಕಾಳ್ ಎತಾ ಮ್ಹುಣ್ತಾನಾ ಆಮಿಂ ಮೊಸ್ತ್ ತಯಾರಾಯ್ ಕರ್ತಾಂವ್. ಸಾಮಾಜಿಕ್ ಕಾರ್ಯಾಕ್ರಮಾನಿಂ ಕಾಜಾರಾಂ ಜಾಯ್ನಾಸ್ತಾಂನಾ ರಾವೊಂಕ್ ಆಮ್ಕಾಂ ಸಮಾಜ್ ಸಾಂಗ್ತಾ. ಕರೆಜ್ಮಾಂತ್ ಸಭಾರ್ ಜಣ್ ಮಾಸ್ ಖಾಯ್ನಾಸ್ತಾಂನಾ ಜಿಂಜ್ವಾರ್ ಕರುಂಕ್ ಪ್ರಯತನ್ ಕರ್ತಾತ್. ಜೆವಿನಾಸ್ತಾಂನಾ ಎಕ್ಟಾಂಯ್ ಕೆಲ್ಲೆಂ ಧನ್ ದಾನ್ ಧರ್ಮ್ ಕರುಂಕ್ ಆಮ್ಕಾಂ ಬೊರೆಂ ಲಾಗ್ತಾ. ಪ್ರಾಚಿತಾಚಾ ಕಾಳಾಕ್ ಕರೆಜ್ಮ್ ಮ್ಹುಣ್ ಲೊಕ್ ವೊಳ್ಕಾತಾ. ಆಯ್ಚಾ ತಿನೀಂ ವಾಚ್ಪಾಂತ್ ಎಕ್ ಪ್ರತ್ಯೆಕ್ ಥರಾಚಿ ಶಿಕೊಣ್ ಇಗರ್ಜ್ಮಾತಾ ಆಮ್ಕಾಂ ದಿತಾ. ಪರ್ವತಾಂಚೊ ಮಹತ್ವ ಪವಿತ್ರ್ ಪುಸ್ತಕಾಂತ್ ಪ್ರತ್ಯೆಕ್ ಥರಾನ್ ದಿಸೊನ್ ಎತಾ. ದೇವ್ ಮೊಯ್ಜೆಕ್ ಪರ್ವತಾರ್ ದಿಸ್ಟಿಕ್ ಪೊಡ್ತಾ. ಮೊಯ್ಜೆಕ್ ಪರ್ವತಾರ್ ಧಾ ಉಪಾದೆಸ್ ದೇವ್ ದಿತಾ. ಸಬಾರ್ ಪ್ರವಾದ್ಯಾಂಕ್ ದೇವ್ ಪರ್ವತಾರ್ ದಿಸ್ಟಿಕ್ ಪೊಡ್ತಾ. ಜೆಜು ತಾಚಾ ಶಿಸಾಂಕ್ ಸಭಾರ್ ಪಾವ್ಟಿಂ ತಾಚಿ ಶಿಕೊಣ್ ಪರ್ವತಾರ್ ದಿತಾ. ಆಯ್ಚಾ ವಾಂಜೆಲಾಂತ್ ಜೆಜು ತಾಚಾ ಶಿಸಾಂಕ್ ತಾಚೆಂ ಪರ್ಜಳಿಕ್ ಮುಕಾಮೊಳ್ ಪರ್ವತಾರ್ ದಾಕಯ್ತಾ. ಜೆಜುಕ್ ದೊನ್ ಕಯ್ದ್ಯಾಂ ಮೊದೆಂ ಪರ್ವತಾರ್ ಖುರ್ಸಾರ್ ಖಿಳಾಯ್ತಾತ್. ಆಮ್ಚೆಂ ತಾರಣ್ ಪರ್ವತಾರ್ ಸುರುಜಾತಾ. ವೊಯ್ಲಾ ಕುಡಾಂತ್ ಜೆಜು ತಾಚಾ ಶಿಸಾಂಕ್ ದಿಸ್ಟಿಕ್ ಪೊಡ್ತಾ. ಅಖೆರೆಕ್ ತೊ ಪರ್ವತಾವೊಯ್ಲೊ ಆಪ್ಲ್ಯಾ ಬಾಪಾ ಸರ್ಸಿಂ ಪಾಟಿಂ ವೆತಾ. ಆಮ್ಚಾ ಜಿವಿತಾಂತ್ ಆಮ್ಕಾಂ ಮೊಸ್ತ್ ಪಾವ್ಟಿಂ ಸಬಾರ್ ಬೊರಿಂ ಘಡಿತಾಂ ಚೊ ಅನ್ಭವ್ ಪರ್ವತಾರ್ ಜಾಲ್ಲ್ಯಾ ಬರಿಂ ದಿಸ್ತಾ. ಹಾಕಾ ಇಂಗ್ಲಿಷಾಂತ್ ಪೀಕ್ ಅನ್ಭವ್ ಮ್ಹುಣ್ತಾತ್. ಇಗರ್ಜೆಂತ್ ಆಮಿಂ ಮಿಸಾಚಾ ಬಲಿದಾನಾಂತ್ ವಾಂಟೊ ಘೆಂವ್ಕ್ ವೆತಾಂವ್. ಆಮ್ಚೆಂ ಸದಾಂಚೆಂ ಕಾಮ್ ಸೊಡ್ನ್ ಆಮಿಂ ಥಂಯ್ ವೆತಾಂವ್. ಅಶೆಂ ಮಿಸಾ ಬಲಿದಾನಾ ವೊರ್ವಿಂ ಆಮ್ಚೆಂ ಸದಾಂಚೆ ಕಾಮ್ ಬೊರ್ಯಾ ರಿತಿತ್ ಕರುಂಕ್ ಆಮ್ಕಾಂ ಬೊಳ್ ಮೆಳ್ತಾ. ಸಾಂ ಪಾವ್ಲು ಆಜ್ ಆಪ್ಲ್ಯಾ ಶಿಸಾಕ್ ತಿಮೊಥಿಕ್ ಸಾಹಸಿಕ್ ಜಾಂವ್ಕ್ ಸಾಂಗ್ತಾ. ತಿಮೊಥಿಚಾ ಕಾಲಾರ್ ಸಬಾರ್ ಥರಾಚಿಂ ಪಾತ್ಕಾಂ ರಾಜ್ ಕರ್ನ್ ಅಸಸ್ಲೆಲಿಂ. ತಾಚೊ ವಿರೊಧಕರುಂಕ್ ತಿಮೊಥಿಕ್ ಧಯ್ರ್ ಘೆಂವ್ಕ್ ಪಾವ್ಲು ಉಲೊ ದಿತಾ. ಸಬಾರ್ ಪಾವ್ಟಿಂ ಪಾಡ್ ವಾಟ್ ಸೊಡ್ನ್ ಬೊರಿ ವಾಟ್ ಧರುಂಕ್ ಧಯ್ರ್ ಜಾಯ್ ತೆಂ ಆಮ್ಚೆ ಲಾಗಿಂ ಆಸಾ? ಆಧುನಿಕ್ ಯುಗಾಂತ್ ಚಡಾವತ್ ಜಾವ್ನ್ ಆಮ್ಚೆಂ ಜಿವನ್ ಸಾಮೂಹಿಕ್ ಥರಾನ್ ನಿರ್ಧಿಶ್ಠ್ ಜಾತಾ. ಆಮ್ಚಾ ಕೊಶೆಡ್ದಾಚಾ ಆವಾಜಾನ್ ಆಮಿಂ ಮುಕಾರ್ ಸರೊಂಕ್ ಪಾಟಿಂ ಸರ್ತಾಂವ್. ಹೆಂ ಕರುಂಕ್ ಧಯ್ರ್ ಜಾಯ್? ತೆಂ ಆಮ್ಚೆ ಲಾಗಿಂ ಆಸಾ? ಆಮಿಂ ರೆತಿರೆಕ್ ವೆತಾಂವ್, ಥಂಯ್ ಶೆರ್ಮಾಂವ್ ಆಯ್ಕೊನ್ ಆಮ್ಚೆಂ ಮೊನ್ ಕಾಂಯ್ ನೊವೆಂ ಕರುಂಕ್ ತಯಾರ್ ಜಾತಾ. ಮೊಸ್ತ್ ಪಾವ್ಟಿಂ ಆಮಿಂ ಬೊರೆ ಬೊರೆ ನಿಚೆವ್ ಕರ್ನ್ ಎತಾಂವ್. ಪೂಣ್ ಸದಾಂಚಾ ಕಾಮಾನಿಂ ಮೆತರ್ ಜಾತಾಚ್ ತೆ ನಿಚೆವ್ ವಿಸರ್ತಾಂವ್. ಪರ್ವತಾರ್ ಜೆಜು ಪೆದ್ರುಕ್, ಜುಂವಾಂವ್ಕ್ ಆನಿ ಜಾಕೊಬಾಕ್ ರುಪಾಂತರಿತ್ ಜಾವ್ನ್ ದಿಸ್ತಾ. ತವೊಳ್ ಪೆದ್ರು ಹೆಂ ಪೊಳೊನ್ ಪುರ್ತೊ ಥಂಯ್ ರಾವೊನ್ ಹೆಂ ರೂಪ್ ಸದಾಂ ಪೊಳೊಂಕ್ ಆಶೆತಾ. ತೊ ಜೆಜುಕ್ ಸಾಂಗ್ತಾ ತೆ ಥಂಯ್ಚ್ ರಾವೊನ್ ತೀನ್ ತಂಬಾಂತ್ ವಸ್ತಿ ಕರುಂಯಾ ಮುಣ್ ಜೆಜುಕ್ ಸಾಂಗ್ತಾ. ತೊ ಕೆವಲ್ ಜೆಜು, ಎಲಿಯಾ ಆನಿ ಮೊಯ್ಜೆಕ್ ಮಾತ್ರ್ ತಂಬಾಂತ್ ರಾವೊಂಕ್ ಚಿಂತಾ. ಹೆಂ ಸಗ್ಳೆಂ ಪೊಳೊನ್ ತೊ ಕಿತೆಂ ಮ್ಹುಣ್ತಾ ಮ್ಹುಳೆಂ ತೊ ನೆಣಾಂ. ಜೆಜು ಆಮ್ಕಾಂ ಸದಾಂಚ್ ತಾಚಿ ಕುರ್ಪಾ ದೀಂವ್ಕ್ ತಯಾರ್ ಆಸ್ತಾ. ಆಮಿಂ ಆಂಕ್ವಾರ್ ಸಾಯ್ಬಿಣಿಂ ಸಾಂಗಾತಾ ತಾಚಾ ಶಿಸಾಂ ಬರಾಬರ್ ಉಗ್ತ್ಯಾ ಮೊನಾಂನ್ ತಾಚಿ ಸಸಾಯ್ ಮಾಗೊಂಕ್ ತಯಾರ್ ಆಸಾಜಯ್. ಮೊಸ್ತ್ ಪಾವ್ಟಿಂ ಜೆಜು ಆಮ್ಚಾ ಜಿವಿತಾಂತ್, ದುಬ್ಳ್ಯಾಂಚಾ ರುಪಾರ್, ಪಿಡೆಸ್ತಾಂಚ್ಯಾ ರುಪಾರ್ ಎತಾ. ತಶೆಂ ಎತಾನಾ ಆಮಿಂ ಮೊಸ್ತ್ ಪಾವ್ಟಿಂ ಆಂಮಿ ತಾಕಾ ವೊಳ್ಕೊಂಕ್ ಸಕಾನಾಂವ್. ಆಜ್ ಜೆಜು ಆಮ್ಕಾಂಚ್ ರುಂಪಾಂತರ್ ಕರುಂಕ್ ತಯಾರ್ ಆಸಾ. ತೊ ಆಮ್ಚಾ ಸಾಂಗಾತಾ ರಾವೊನ್ ಆಮ್ಕಾಂ ತಾಚಿ ಕುರ್ಪಾ ದಿತಾನಾ ಆಮಿಂ ತಿ ಘೆಂವ್ಯಾ. ಜೆಜುಚಿ ಸಸಾಯ್ ಸದಾಂ ಆಮ್ಚೆ ಸಾಂಗಾತ್ ರಾವೊನ್ ಆಮ್ಕಾಂ ಧಯ್ರದೀಕ್ ಕರುಂ. ತುಮ್ಚಾ ಮೊಗಾಚೊ, ದೆಯ್ವಿಕ್ ಸೊಬ್ದಾಚೊ ಸಾಂದೊ. ಬಾಪ್ ಜುಜೆ ವಾಸ್ ಎಸ್.ವಿ.ಡಿ. ಇಂದೊರ್ ಮ.ಪ್ರ. 09893004626