ಪ್ರಾಚಿತಾಚೊ ಕಾಳ್, "ಕರೆಜ್ಮ್" ಚೊವ್ತೊ ಆಯ್ತಾರ್ ವೊರ್ಸ್ I ವಿಷಯ್: ಪಾತ್ಯೆಣೆಚೊ ಘುರ್ತ್.೩೦-೦೩-೨೦೧೪

ಪ್ರಾಚಿತಾಚೊ ಕಾಳ್, "ಕರೆಜ್ಮ್" ಚೊವ್ತೊ ಆಯ್ತಾರ್ ವೊರ್ಸ್ I ವಿಷಯ್: ಪಾತ್ಯೆಣೆಚೊ ಘುರ್ತ್.೩೦-೦೩-೨೦೧೪ ಸಾಮುಯೆಲಾಚಾ ಪೊಯ್ಲ್ಯಾ ಫುಸ್ತಕಾಂತ್ಲೆ ಪೊಯ್ಲೆಂ ವಾಚಾಪ್ 16:1b,6-7, 10-13b ದೆವಾನ್ ದಾವಿದಾಕ್ ವಿಂಚ್ಲೊ. ಸಾಂ ಪಾವ್ಲಾಚೆಂ ಎಫೆಜ್ ಗಾರಾಂಕ್ ಬೊರಯ್ಲ್ಯಾ ಪತ್ರಾಂತ್ಲೆಂ ದುಸ್ರೆಂ ವಾಚಾಪ್ 5:8-14 ಜಳ್ತೊ ದಿವೊ ಸಾಂ ಜುಂವಾವ್ಚಾ ವಾಂಜೆಲಾಂತ್ಲೊ 9:1-41ಕುಡ್ಡ್ಯಾಕ್ ದೀಶ್ಠ್ ಲಾಬ್ತಾ. ಆಮ್ಚಿ ಜಿಣ್ ಸದಾಂನೀತ್ ಕಾಂಯ್ ಘಡಾನಾಸ್ತಾನಾ ಚಲ್ಲ್ಯಾರ್ ಆಮಿಂ ಭಾರೀ ಸಂತೊಸ್ ಪಾವ್ತಾಂವ್. ಆಮ್ಚೆಂ ಸದಾಂಚೆಂ ಕಾಮ್ ಕರ್ನ್ ಆಮ್ಚಿಂ ಹರೆಕಾ ದಿಸಾಚಿಂ ಕಾರ್ಯಿಂ ನೀದ್, ಜೆವಾಣ್, ಘರ್ಚಾ ಲೊಕಾ ಸಾಂಗಾತಾ ವೇಳ್ ಖರ್ಚುನ್ ಆಮಿಂ ಜಿಯೆತಾನಾ ಆಮ್ಕಾಂ ಖುಶಿ ಜಾತಾ. ಅಸಲಿಂ ಕಾಮಾ ಕರ್ತಾನಾ ಆಮ್ಕಾಂ ಪುರಾಸಾಣ್ ಜಾಯ್ನಾ ಹೆಂ ಆಮಿಂ ಖುಶೆನ್ ಕರ್ತಾಂವ್. ಆಮ್ಚಿ ಕಾಮಾ ಸ್ವಪ್ರೆರಣಾನ್ ಕರ್ತಾನಾ ಆಮ್ಕಾಂ ಬೊರೆಂ ಪ್ರೊತ್ಸಾಹನ್ ಮೆಳ್ತಾ. ಆಮ್ಚಾ ಕಾಮಾಂಚಿ ಆಮ್ಕಾಂ ವೊಳೊಕ್ ಜಾತಾನಾ ತೆಂ ಕಾಮ್ ಕರುಂಕ್ ಆಮ್ಕಾಂ ಚಡ್ ಅನಿಂ ಚಡ್ ಬೋಳ್ ಮೆಳ್ತಾ. ಆಮ್ಚಾ ಜಿವನಾಚೊ ಅರ್ಥ್ ಆಮಿಂ ಸಮ್ಜಾತಾಂವ್, ಆನಿಂ ಜಿವಿತ್ ಜಿಯೆಂವ್ಕ್ ಆಮ್ಕಾಂ ಹುಮೆದ್ ಮೆಳ್ತಾ. ಜಿವಿತಾಚೊ ಉದ್ದೆಶ್ಯ್ ಆನಿ ಜಿವಿತಾಚೆಂ ಲಕ್ಷ್ಯ್ ಮೆಳ್ತಚ್ ಮುನ್ಶಾಕ್ ಕಸಲ್ಯಾಯ್ ದುಸ್ರ್ಯಾ ವೊಸ್ತುಂಚಿ ಗರ್ಜ್ ಆಸಾನಾ. ಆಯ್ಚಾ ಮಿಸಾಚಾ ಬಲಿದಾನಾಂತ್ ಆಮಿಂ ಹಾಜರ್ ಜಾವ್ನಾ ಸಾಂವ್. ಹೆಂ ಆಮ್ಚಾ ಸಡ್ವೊಣೆಚಾ ಪಯ್ಣಾಂಚೆ ಎಕ್ ಪ್ರಮ್ಹುಖ್ ಘಡಿತ್. ಆಮಿಂ ಪೊಯ್ಲ್ಯಾ ವಾಚ್ಪಾಂತ್ ಆಯ್ಕಾಲೆಂ, ಕಶೆಂ ದೆವಾನ್ ಎಕಾ ಸಾಧಾರಣ್ ಭುರ್ಗ್ಯಾಕ್, ಇಸ್ರಾಯೆಲಿಂಚೊ ಮುಖೆಸ್ತ್ ಕರ್ನ್ ವಿಂಚ್ಲೆಂ. ತೊ ಎಕ್ ಸಾಧಾರಣ್ ಗೊವ್ಳಿ, ತಾಚಾ ಬೊಕ್ರ್ಯಾಂಕ್ ಚರೊನ್ ಆಸ್ಲೊಲೊ. ಥಂಯ್ ತಾಕಾ ಸೊದುನ್ ಎವ್ನ್, ಸಾಮುಯೆಲ್ ಪ್ರವಾದಿನ್, ತಾಕಾ ಇಸ್ರಾಯೆಲಿಂಚೊ ರಾಯ್ ಮ್ಹುಣ್, ಮಾಕ್ಲೊ. ತಶೆಂಚ್ ಸಾಂ ಪಾವ್ಲಾ ಚಾ ಎಫೆಜ್ ಗಾರಾಂಚಾ ಪತ್ರಾಂತ್ ಉಜ್ವಾಡಾಚಾ ಗುಣಾ ವಿಶೆಂತ್ ಬೊರೆಂ ವರ್ಣನ್ ಆಸಾ. ಉಜ್ವಾಡ್ ಸರ್ವ್ ವೊಸ್ತು ಪರ್ಜಳಾಯ್ತಾ. ಉಜ್ವಾಡ್ ಕಾಳೊಕಾಕ್ ಧಾಂವ್ಡಾಯ್ತಾ. ತಶೆಂಚ್ ಹರೆಕಾ ಕ್ರಿಸ್ತಾಂವ್ ಮುನ್ಶಾಚೆಂ ಜಿವನ್ ಕ್ರಿಸ್ತಾಚಾ ಅಗಣಿತ್ ಉಜ್ವಾಡಾನ್ ಭೊರೊನ್ ಪರ್ಜಳೊಂಕ್ ಲಾಗ್ಲಾಂ. ಕ್ರಿಸ್ತಾವಾಂಚಾ ಜಿಣಿಂಯೆಂತ್ ಪಾತ್ಕಾಂಕ್ ಜಾಗೊ ನಾ. ಪಾತ್ಕಾಂಕ್ ಧಾಂವ್ಡಾವ್ನ್ ಬೊರೆಪೊಣಾಚಾ ಗುಣಾಂಕ್ ಜಾಗೊ ದಿಂವ್ಕ್ ಆಮ್ಕಾಂ ಉಲೊ ದಿತಾ ಆಜ್ ಸಾಂ ಪಾವ್ಲ್. ಪೂಣ್ ಆಮ್ಚಿ ಜಿಣಿ ಮೊಸ್ತ್ ಪಾವ್ಟಿಂ ಪಾತ್ಕಾಚಾ ಕಾಳೊಕಾಂತ್ ಸಾಸ್ಪಾತಾ. ತವೊಳ್ ಆಮ್ಕಾಂ ಮಿಸಾ ತಸಲ್ಯಾ ಉಜ್ವಾಡಾಕ್ ಪೊಳೊಂಚೆ ಭಾಗ್ ದೇವ್ ದಿತಾ. ಆಯ್ಚೊ ವಾಂಜೆಲ್ ಆಮ್ಕಾಂ ಕುರ್ಡ್ಯಾಪೊಣಾಚಾ ಕಾಳೊಕಾಂತ್ಲೆ ಭಾಯ್ರ್ ಕಾಡುಂಕ್ ಉಲೊ ದಿತಾ. ಆಜ್ ಮಾಕಾಂ ಎಕಾ ಕ್ರಿಸ್ತಾಂವ್ ಭಯ್ಣಿ ಚೊ ಫೊನ್ ಆಯ್ಲೊ. ತಿ ಮಾಕಾಂ ವಿನಂತಿ ಕರಿ ಲಾಗ್ಲಿ, ಹಾಂವೆ ಮಾಗೊನ್ ತಿಚಾ ಘೊವಾಕ್ ಗೂಣ್ ಜಾಂವ್ಕ್ ಮಾಗಾಜಯ್ ಮ್ಹುಣ್. ತಿಚಾ ಘೊವಾಚಾ ಭಾವಾಡ್ತಾ ವಿಶೆಂತ್ ಹಾಂವೆ ಇಚಾರ್ತಾನಾ, ತಿ ಮ್ಹುಣಾಲಿ ತೊ ಎಕ್ ಅನ್ಭಾವಾಡಿತ್ತಿ. ಸಿರೊಫೆನಿಸಿಯಾಚಾ ಬಾಯ್ಲೆಚಾ ಭಾವಾಡ್ತಾಚೊ ಉಲ್ಲೆಕ್ ಕರ್ನ್ ಹಾಂವ್ ಮ್ಹುಣಾಲೊಂ. ಸಿರೊಫೆರ್ನಿಶಿಯನ್ ಬಾಯ್ಲ್, ಅನಭಾವಾಡ್ತಿ, ಜಾಲ್ಯಾರೀ ತಿಚಾ ಭಾವಾಡ್ತಾನ್ ತಿಚಾ ಧುವೆಕ್ ಜೆಜುನ್ ಗೂಣ್ ಕೆಲೆಂ. ಹೆಂ ಆಯ್ಕೊನ್ ತಿ ಭಾಯ್ಲ್ ಮೊನಿಸ್ ಉತ್ರಾಂವೀಣ್ ಜಾಲಿ. ಹಾಂವೆ ತಿಕಾ ಧಯ್ರ್ ದೀವ್ನ್ ಭಾವಾಡ್ತಾಂತ್ ಥಿರ್ ಜಾಂವ್ಕ್ ಸಾಂಗ್ಲೆ. ತಿಣೆ ತಿಚಾ ಭಾವಾಡ್ತಾನ್ ತಿಚಾ ಘೊವಾಕ್ ಗೂಣ್ ಕರೊವ್ಯೆತಾ. ವೊಯ್ ಆಯ್ಚಿಂ ವಾಚ್ಪಾಂ ಆಮ್ಕಾಂ ಶಿಕಯ್ತಾತ್, ದೆವಾಕ್ ಎಕಾ ಗೊವ್ಳ್ಯಾಕ್ ರಾಜ್ ಪಾಟಾರ್ ಬೊಸೊಂಚೊ ಅಧಿಕಾರ್ ಆಸಾ. ಎಕಾ ಕುರ್ಡ್ಯಾ ಮ್ಹುನ್ಶಾಕ್ ಆಮ್ಚಾ ಸಡ್ವೊಣೆಚಾ ಕಾಣಿಂಯೆಚೊ ಎಕ್ ಪ್ರಮ್ಹುಖ್ ಪಾತ್ರದಾರ್ ಕರ್ಚೆಂ ಹಕ್ ಆಸಾ. ತರ್ ಆಜ್ ವಾಂಜೆಲ್ ಆಮ್ಕಾಂ ಆಮ್ಚೆಂ ಕುರ್ಡ್ರೆಂಪೊಣ್ ಪೊಯ್ಸ್ ಕರ್ನ್ ಬೊರಿ ದೀಶ್ಟ್ ಹಾಡುಂದಿ. ಜೆಜುನ್ ಸಾಧಾರಣ್ ಮಾತಿ ಆನಿ ಥಿಂಪಿ ಯೆಚೊ ಪ್ರಯೊಗ್ ಕರ್ನ್ ಕುಡ್ಡ್ಯಾ ಮ್ಹುನ್ಶಾಕ್ ಗೂಣ್ ಕೆಲೆಂ. ಆಜ್ ತೊ ಆಮ್ಕಾಂ ಆಯ್ಚಾ ಮಿಸಾಚಾ ಸಾಕ್ರಾಮೆಂತಾಂತ್ ಹಾಜರ್ ಜಾವ್ನ್ ಆಮ್ಚೆಂ ಜಿವನ್ ಸುಖಾಭರಿತ್ ಕರುಂಕ್ .ಎತಾ ತಾಕಾ ಆಮಿಂ ಆಮ್ಚಾ ಕಾಳ್ಜಾಂನಿ ಘೆವ್ನ್ ಆಮ್ಚೆ ಸಾಂಗಾತಾ ಆಸ್ರೊ ದಿಂವ್ಯಾ. ಆಮ್ಚಾ ಹರೆಕಾ ದಿಸಾಚಾ ಕಾಮಾನಿಂ ಆಮಿಂ ತಾಕಾ ಜಾಗೊ ದೀವ್ನ್ ಹೊ ಕರೆಜ್ಮಾಚೊ ಕಾಳ್ ಖ್ಹುಶಾಲ್ ಭರಿತ್ ಕರ್ಯಾಂ. ಕರೆಜ್ಮಾ ಚೊ ವೇಳ್ ಆಮಿಂ ಆಮ್ಚೆ ಜಿವನ್ ದೆವಾ ಖಾತಿರ್ ತಯಾರ್ ಕರ್ಚೊ ವೇಳ್. ಆಮ್ಚಾ ಪಾತ್ಕಾಂ ಖಾತಿರ್ ರಡೊನ್ ದೂಃಖ್ ಧರ್ಚೊ ವೇಳ್. ತರ್ ತಡೊವ್ ಕಿತ್ಯಾಕ್ ಆಮಿಂ ತಯಾರ್ ರಾವೊನ್ ಪ್ರಕಾಶಾಕ್ ಜಾಗೊ ದೀವ್ನ್ ಬೊರೆ ಕ್ರಿಸ್ತ್ ಭಕ್ತ್ ಜಾವ್ಯಾಂ. ತುಮ್ಚಾ ಮೊಗಾಚೊ, ದೆಯ್ವಿಕ್ ಸೊಬ್ದಾಚೊ ಸಾಂದೊ, ಬಾಪ್ ಜುಜೆ ವಾಸ್ ಎಸ್.ವಿ.ಡಿ. ಇಂದೊರ್ ಮ.ಪ್ರ. ೦೯೮೯೩೦೦೪೬೨೬