ಪ್ರಾಚಿತಾಚೊ ತಿಸ್ರೊ ಆಯ್ತಾರ್ ಕಾಳ್ I ವಿಷಯ್: ಆದ್ಯಾತ್ಮಿಕ್ ತಾನ್ 23-03-14

ಪ್ರಾಚಿತಾಚೊ ತಿಸ್ರೊ ಆಯ್ತಾರ್ ಕಾಳ್ I ವಿಷಯ್: ಆದ್ಯಾತ್ಮಿಕ್ ತಾನ್ 23-03-14 ಪಯ್ಣ್ ಪುಸ್ತಕಾಂತ್ಲೆ ಪೊಯ್ಲೆಂ ವಾಚಾಪ್:17:3-7 ಖಡ್ಪಾಂತ್ಲೆ ಉದಾಕ್. ಸಾಂ ಪಾವ್ಲಾಚೆಂ ರೊಮಿಂಗಾರಾಂಕ್ ಪತ್ರಾಂತ್ಲೆಂ ದುಸ್ರೆಂ ವಾಚಾಪ್: 5:1-2, 5-8 ನಿತಿವಂತ್ಪೊಣಾಂಚೊ ಫಳ್. ಸಾಂ ಜುಂವಾವ್ಚೊ ವಾಂಜೆಲ್ : 4:5-42 ಸಾಮಾರಿ ಸ್ತ್ರೀ ಆನಿ ಜೆಜು. ಸಂಸಾರಾಂತ್ಲ್ಯಾ ಪ್ರಕ್ರತಿಂತ್ 3/4 ಉದಾಕ್ ಆಸ್ತಾ ಮ್ಹುಳೆಂ ವ್ಯಜ್ನಾನಿಕ್ ಸಾಂಗ್ತಾತ್. ಅಶೆಂ ಆಮ್ಚಾ ಜಿವನಾಂತ್ ಉದ್ಕಾಚೊ ಮ್ಹಹತ್ವ ಆಮಿಂ ಸಮ್ಜೊವೆತಾ. ಆಮ್ಚಾ ಪ್ರಕ್ರತೆಂತ್ ಆಮಿಂ ಜಾಣಾಂವ್ 3/4 ಉದೊಕ್ ಭೊರೊನ್ ಆಸಾ. ಆಮ್ಕಾಂ ಉದ್ಕಾಚಿ ಕಿತ್ಲಿ ಗರ್ಜ್ ಮ್ಹುಳೆಂ ಆಮ್ಕಾಂ ತಾನ್ ಲಾಗ್ಲೆಲ್ಯಾ ವೆಳಾರ್ ಆಮ್ಕಾಂ ಕಳ್ತಾ. ಉದ್ಕಾ ವಿಣೆ ಆಮಿಂ ಎಕ್ ಘಡಿ ಸಮೆತ್ ಜಿಯೆಂವ್ಕ್ ಕಸ್ಟ್. ಆಮ್ಕಾಂ ಪುರಾಸಣ್ ಜಾಲ್ಲ್ಯಾ ವೆಳಾರ್ ಆಮಿಂ ಸೊದ್ಚೆಂ ಪೊಯ್ಲೆಂ ಉದಾಕ್. ಜಾಣಾರಿ ಮ್ಹುಣ್ತಾತ್ ಜರ್ ಯಾ ಸಂಸಾರಾಂತ್ ದಸ್ರೆಂ ಮಹಾಝುಝ್ ಜಾಯ್ತ್ ಜಾಲ್ಯಾರ್ ತೆಂ ಜಾತೆಲೆಂ ಉದ್ಕಾ ಖಾತಿರ್ ಝುಝ್. ಆಮಿಂ ಜಾಣಾಂವ್ ಆನಿಂ ಪೊಳೆತಾಂ ಭೊವ್ಗೊಳಿಕ್ ಹುಣ್ಶಾಣ್ ಚಡ್ತೆ ಆಸಾ. ಸಕ್ಕಡ್ ಹಾಚೆ ವಿಶೆಂತ್ ಉಲೊನ್ ಆಸಾತ್ ಪೂಣ್ ಕೊಣೀಂ ಎದೊಳ್ ಸಾಮಾಧಾನ್ ಹಾಡ್ತೊಲೊ ಜಲ್ಮೊಂಕ್ ನಾಂ. ಬಾಯ್ಬಲಾಂತ್ ಮೊಸ್ತ್ ಪಾವ್ಟಿಂ ಉದ್ಕಾ ಚೊ ಸಂಕೆತ್ ಮೆಳ್ತಾ: 1. ಎಜೆಕಿಯೆಲ್ ಪ್ರವಾದಿಚಾ ಬುಕಾಂತ್ 47:1 ತೆಂಪ್ಲಾಂತ್ ಝರ್ ಉಬ್ಜಾತಾ: ದೇವ್ ಜೀವ್ ದಿತಾ. 2. ಜ಼ಾಖಾರಿಯಾ ಪ್ರವಾದಿಚಾ ಬುಕಾಂತ್: 14:8 ಜೆರುಜಾಲೆಂಮಾ ಥಾವ್ನ್ ಉದ್ಕಾ ಝರ್ ಉಬ್ಜಾತೆಲಿ. 3. ಜುವಾಂವ್ಚಾ ವಾಂಜೆಲಾಂತ್ ಉದ್ಕಾಚೊ ಸಂಕೆತ್ ಪೊಳೊಂಕ್ ಮೆಳ್ತಾ: a. ಕಾನಾಂತ್ ಜೆಜು ಉದಾಕ್ ವಾಯ್ನಾಂತ್ ಬದ್ಲಿತಾ. ಜುವಾಂವ್: 2:7 b. ಜೆಜು ಬೆತ್ಜಾಜಾ ತಳ್ಯಾ ಕಡೆಂ ಆಸ್ಚ್ಯಾ ಥೊಂಟ್ಯಾಕ್ ಗೂಣ್ ಕರ್ತಾ.ಜುವಾಂವ್: 5:7 c. ಸಿಲೊಆಮ್ ನಂಯ್ತ್ ಕುಡ್ಡೊ ದೊಳೆ ಧುವ್ನ್ ಪೊಳೊಂಕ್ ಲಾಗ್ತಾ.ಜುವಾಂವ್: 9:7 d. ಜೆಜು ಆಪ್ಲ್ಯಾಚ್ ಕುಶಿ ಥಾವ್ನ್ ಜಿವಿತಾಚಿ ಝರ್ ಎಂವ್ಚೆ ಸಾಂಗ್ತಾ ಕಳಯ್ತಾ: ಜುವಾಂವ್: 7:38 e ಜೆಜು ನಿಕೊದೆಮಾಂಕ್ ಸಾಂಗ್ತಾ ಆಮಿಂ ಉದ್ಕಾಂತ್ ಥಾವ್ನ್ ಜಲ್ಮಾಲ್ಯಾರ್ ಆಮ್ಕಾ ಪವಿತ್ರ್ ಆತ್ಮೊ ಮೆಳ್ತೊಲೊ. ಜುವಾಂವ್: 2:5 ಪಯಿಣಾಚಾ ಪುಸ್ತಕಾಂತ್ ಆಮಿಂ ವಾಚ್ತಾಂವ್: ಲೊಕ್ ಉದ್ಕಾ ಖಾತಿರ್ ಮೊಯ್ಜೆಕಡೆಂ ಲಡಾಯ್ ಕರ್ತಾನಾ ತೊ ಖಡ್ಪಾಂತ್ಲೆ ಉದಾಕ್ ತಾಂಕಾ ದಿತಾ. ಆಯ್ಚಾ ವಾಂಜೆಲಾಂತ್ ಜೆಜು ತಿರಾ ದಣ್ವೊನ್ ಬಾಂಯ್ಚಾ ಕಾಟ್ಯಾರ್ ಬೊಸ್ತಾ. ಜುದೆವ್ ಕೆದಾಳಾರೀ ಬಾಂಯ್ಚಾ ಕಾಟ್ಯಾರ್ ಬೊಸಾನಾತ್ಲೆಲೆ. ಜಾಲ್ಯಾರೀ ಆಜ್ ಜೆಜು ತಾಂಚಿ ಹಿ ರಿವಾಜ್ ಮೊಡ್ತಾ. ಎಕ್ ಸಾಮಾರಿ ಸ್ತ್ರೀ ಉದ್ಕಾಕ್ ಬಾಂಯ್ ಲಾಗಿಂ ಎತಾ. ಜೆಜು ತಿಚೆ ಲಾಗಿಂ ಪಿಯೊಂಚೆ ಉದಾಕ್ ಇಚಾರ್ತಾ. ತಿ ಹೆಂ ಆಯ್ಕೊನ್ ಥಠಕ್ ಜಾತಾ. ಕಿತ್ಯಾಕ್ ಎಕ್ ಜುದೆವ್ ಕೆದಿಂಚ್ ಎಕಾ ಸಾಮಾರಿ ಲಾಗ್ಚೆಂ ಉದೊಕ್ ಪಿಯೆನಾ. ತಿ ಮ್ಹುಣ್ತಾ "ಧನ್ಯಾಂ ತುಂ ಎಕ್ ಜುದೆವ್ ಮುಜಾ ನೀಚ್ ಸ್ತ್ರಿಯೆಲಾಗ್ಚೆಂ ಉದಾಕ್ ಪಿಯೆಶಿ ಜಾಲ್ಯಾರ್ ತುಂ ಬ್ರಶ್ಟ್ ಜಾಶಿ". ಜೆಜು ಮ್ಹುಣ್ತಾ, "ಸ್ತ್ರಿಯೆ ತುಂ ನೆಣಾಂಯ್, ತುಜೆ ಲಾಗಿಂ ಉದಾಕ್ ಇಚಾರ್ತಾ ತೊಣ್ ಮ್ಹುಣ್, ಜರ್ ತು ತಚೆ ವಿಶೆಂತ್ ಜಾಣಾ ಜಾಶಿ ಜಾಲ್ಯಾರ್ ತಾಚೆ ಗಡೆಂ ಉದಾಕ್ ದೀ ಮ್ಹುಣ್ ಸಾಂಗ್ತಯ್". ಸಾಮಾರಿ ಸ್ತ್ರೀ ತೊ ಎಕ್ ಪ್ರವಾದಿ ಮ್ಹುಣ್ ಚಿಂತುನ್ ಮ್ಹುಣಾಲಿ, "ಸೊಮಿಂಯಾಂ ತೆಂ ಉದಾಕ್ ಮಾಕಾ ದೀ". ಸಾಮಾರಿ ಸ್ತ್ರೀ ಚಿಂತಾ ತಿಕಾ ಆನಿ ಹಾಚೆ ಉಪ್ರಾಂತ್ ಉದ್ಕಾ ಎಂವ್ಚಿ ಪುರಾಸಾಣ್ ಕರಿಜಯ್ ಮ್ಹುಣ್ ನಾಂ. ಜೆಜು ತಿಕಾ ತಿಚೆ ಸಗ್ಳೆ ಜಿಣಿಯೆಚಿ ಚರಿತ್ರಾ ಸವಿಸ್ತಾರ್ ಸಾಂಗ್ತಾ. ಹೆಂ ಆಯ್ಕೊನ್ ತಿ ವಿಜ್ಮಿತ್ ಜಾವ್ನ್ ಮ್ಹುಣ್ತಾ ತುಂ ಎಕ್ ಜಾಣಾರಿ. ಅಶೆಂ ತಿಚಿಂ ಪಾತ್ಕಾಂ ಸಮೆತ್ ತೊ ಉಚಾರ್ನ್ ಸಾಂಗ್ತಾನಾ ತಿ ಸಂಪೂರ್ಣ್ ವಿಜ್ಮಿತ್ ಜಾವ್ನ್ ಗಾಂವಾಂ ಭಿತರ್ ಧಾವೊನ್ ಲೊಕಾಕ್ ಆಪೊನ್ ಹಾಡ್ತಾ. ಲೊಕ್ ಜೆಜುಕ್ ಪೊಳೊನ್ ತಾಚೆರ್ ಪಾತ್ಯೆಂವ್ಕ್ ಲಾಗ್ತಾ. ಲೊಕ್ ಸ್ತ್ರಿಯೆಚೆಂ ಉತಾರ್ ಪಾತ್ಯೆತಾ. ಮಿಶೊನರಿ ಸ್ತ್ರೀ ತಿ ಜಾತಾ. ದೇವ್ ಅಸಲೆ ಸ್ತ್ರಿಯೆಕ್ ವಿಂಚುನ್ ತಾಚಾ ಎಣ್ಯಾ ವಿಶೆಂತ್ ಸೂಚಿತ್ ಕರ್ತಾ. ಜೆಜು ಹರೆಕಾ ಘಡಿತಾಂತ್ ಆಸ್ತಾ ಮ್ಹುಳೆಂ ಸತ್ ಆಜ್ ಆಮ್ಕಾಂ ಇಗರ್ಜಮಾತಾ ಶಿಕೊಂಕ್ ಪ್ರಯತನ್ ಕರ್ತಾ. ಜೆಜುಚಿ ಉಪಸ್ತಿತಿ ಸಮ್ಜೊನ್ ತಾಚೆರ್ ಪಾತ್ಯೆಂವ್ಕ್ ಆಮ್ಕಾಂ ಉಲೊ ದಿತಾ. ಜಿವಿತಾಚೆಂ ಉದೊಕ್ ಜೆಜು ಆಮ್ಕಾಂ ಹರೆಕಾ ಮಿಸಾಚಾ ಬಲಿದಾನಾಂತ್ ದಿತಾ. ತಾಚೆರ್ ಪಾತ್ಯೆಣಿ ದೊವ್ರುನ್ ಆಮಿಂ ಹರೆಕ್ ತಾಚೆಂ ಜಿವಿತಾಚೆಂ ಉತೊರ್ ಆಮ್ಜೆ ಜಿವಿತಾಂತ್ ಲಾಗು ಕರಿಜಯ್. ತುಮ್ಚಾ ಮೊಗಾಚೊ ದೆಯ್ವಿಕ್ ಸೊಬ್ದಾಚೊ ಸಾಂದೊ ಬಾಪ್ ಜುಜೆ ವಾಸ್ ಎಸ್.ವಿ.ಡಿ. ಸಾಂತ್ ಜುಜೆ ಚೆಂ ಘರ್, ಸಾಂತ್ ಆರ್ನೊಲ್ಡ್ ಜಾನ್ಸನ್ ಕೆಂಪಸ್, ೭/೧ ಬೌಂಡರಿ ರೊಡ್ ಇಂದೊರ್ ಮ.ಪ್ರ. ೪೫೨೦೦೧ ೦೯೮೯೩೦೦೪೬೨೬