ವಿಸಾಂವೊ ಆಯ್ತಾರ್ ಸಾಧಾರಣ್ ಕಾಳ್ ವೊರ್ಸ್ B 16-08-15
ವಿಷಯ್:  ಜಿವಿತಾಚೊ ಉಂಡೊ.
ಪೊಯ್ಲೆಂ ವಾಚಾಪ್  ಗಾದಿ ಗ್ರಂಥಾಂತ್ಲೆ 9:1-6 ದೇವ್ ಆಮ್ಕಾಂ ಜೆವ್ಣಾಕ್ ಆಪೊಯ್ತಾ.
ಎಫೆಜ್ ಘಾರಾಂಕ್ ಪಾವ್ಲುಚಾ ಪತ್ರಾಂತ್ಲೆ ದುಸ್ರೆಂ ವಾಚಾಪ್ 5:15-20 ದೆವಾ ಮುಕಾರ್ ಆಮಿಂ ಬುದ್ವೊಂತ್ಕಾಯೆನ್ ಚಲಾಜಯ್.
ಸಾಂ ಜುಂವಾವ್ಚಾ ವಾಂಜೆಲಾಂತ್ಲೊ 6:51-58 ಜೆಜು ಸರ್ಗಿಂ ಥಾಂವ್ನ್ ದೆಂವೊನ್ ಆಯ್ಲೊ ಜಿವಿತಾಚೊ ಉಂಡೊ.
ಆಮಿಂ ಲ್ಹಾನ್ ಆಸ್ತಾನಾಂ ಭುತಿ ವೊರ್ತೆಲ್ಯಾಂವ್.
ಮಾಕಾಂ ಮುಜಾ ಇಸ್ಕಾಲಾಕ್ ವೆಚಾ ದಿಸಾಂನಿ ಭುತಿ ವೆಲ್ಲೊ ಆನಿಂಕೀ ಉಡಾಸ್ ಆಸಾ.
ಹಾಂವೆ ಅರ್ದ್ಯಾ ವಾಟೆರ್ ಪಾವ್ತಚ್ ಭುತಿ ಉಗ್ತಿ ಕರ್ನ್ ಮಾಂಯ್ನ್ ಕಿತೆಂ ತೊಂಡ್ಲಾಂವ್ಕ್ ದಿಲಾಂ ಮುಣ್ ಪೊಳೊಂಚೆ ಆಸ್ಲೆಂ.
ಆತಾಂ ಯ್ ಲೊಕ್ ಕಾಮಾಕ್ ವೆತಾನಾ ಭುತಿ ಬಾಂದುನ್ ವೊರ್ತಾತ್.
ಜೆವ್ಣಾಚೊ ವೇಳ್ ಜಾತಚ್ ಈಸ್ಟ್ ಸಾಂಗಾತಾ ಬೊಸೊನ್ ಜೆವ್ತಾನಾ ಎಕಾ ಮೆಕಾಚಿ ಭುತಿ ವಾಂಟುನ್ ಜೆಂವ್ಚೆಂ ಆಮಿಂ ಪೊಳೆಲಾಂ.
ಅಶೆಂ ಕೆಲ್ಲ್ಲ್ಯಾನ್ ಆಮ್ಚೊ ಎಕ್ವೊಟ್ ಚಡ್ತಾ.
ಮೋಗ್ ಶಾಸ್ವಿತ್ ಜಾತಾ. ವಾಂಟುನ್ ಘೆಂವ್ಚೊ ಶೆವೊಟ್ ಆಮಿಂ ಶಿಕ್ತಾಂವ್.
ಆಮ್ಚೆಂ ಜಿವಿತ್ ಎಕ್ ಲಾಂಬ್ ಪಯ್ಣ್.
ಹ್ಯಾ ಪಯ್ಣಾರ್ ಆಮಿಂ ಸಭಾರ್ ಥರಾಂಚಾ ಲೊಕಾಕ್ ಭೆಟ್ತಾಂವ್..
ರಯ್ಲಾಚೆಂ ಪಯ್ಣ್ ಕರ್ತಾನಾ ಆಮಿಂ ಹಾಡ್ಲೆಂಲೆಂ ಖ್ಹಾಣ್ ವಾಂಟುನ್ ಜೆಂವ್ಚಿ ರಿವಾಜ್ ಆತಾಂಯ್ ರಯ್ಲಾಚಾ ಕಂಪಾರ್ಟಮೆಂಟಾಂತ್ ಆಮಿಂ ಪೊಳೆತಾಂವ್.
ಜೆಜುಕ್ ಗೊತ್ತಾಸ್ಲೆಲೆಂ ಆಮ್ಕಾಂ ಆಮ್ಚಾ ಸದಾಂಚಾ ಪಯ್ಣಾರ್ ತಾಚಾ ಜಿವಿತಾಂಚೆ ಖ್ಹಾಣ್ ಜಾಯ್ ಮುಣ್.
ದೆಕುನ್ ಜೆಜು ಮೊಗಾನ್ ತಾಚಾ ಸಿಸಾಂಕ್ ಸಾಂಗ್ತಾ ತೊ ಜಾವ್ನಾಸಾ ಸರ್ಗಾಥಾವ್ನ್ ದೆಂವ್ಲೊಲೊ ಜಿವಿತಾಚೊ ಉಂಡೊ.
ದೆಕುನ್ ಜೆಜು ಆಮ್ಕಾಂ ಮಿಸಾಚೆಂ ಬಲಿದಾನ್ ದಿತಾ.
ಆಪ್ಲೊ ಜೀವ್ ಉಂಡ್ಯಾ ಆನಿಂ ವಾಯ್ನಾ ರುಪಾರ್ ದೀವ್ನ್ ಜೆಜುನ್ ತಾಚಿಚ್ ಕೂಡ್ ಆನಿಂ ರಗಾತ್ ಆಮ್ಕಾಂ ದಿಲಾಂ.
ಆಮಿಂ ಪೊಳೆಲಾಂ ಕಶೆಂ ಲೊಕ್ ಇಗರ್ಜೆಕ್ ಭೆಟ್ ದಿತಾತ್.
ಸಾಕ್ರಾಮೆಂತಾಂತ್ ಆಸ್ಚಾ ಜೆಜುಕ್ ತೆ ಭೆಟ್ತಾತ್.
ತಾಂಚೆ ಸುಖ್ ದೂಖ್ ತೆ ತಾಚೆ ಸಾಂಗಾತಾ ವಾಂಟುನ್ ಘೆತಾತ್.
ಹಾಂವ್ ಲ್ಹಾನ್ ಆಸ್ತಾನಾ ಅಯ್ಕಾಲ್ಲಿ ಕಾಣಿ ಹಿ.
ಎಕ್ ಜಾಂಟೊ ಸದಾಂ ಕಾಮಾಕ್ ವೆತಾನಾ ಇಗರ್ಜೆ ಮುಕಾರ್ ಥಾವ್ನ್ ಪಾಶಾರ್ ಜಾತಾಲೊ.
ಇಗರ್ಜೆಚಾ ಮುಕಾರ್ ಎತಾನಾ ತೊ ಸಾಕ್ರಾಮೆಂತಾಂತ್ ಆಸ್ಚಾ ಜೆಜುಕ್ ಮರ್ಯಾದಿನ್ ಮಾನ್ ಬಾಗಾವ್ನ್ ನಮಾಸ್ಕಾರ್ ಕರ್ತಾಲೊ.
ಆಪ್ಲ್ಯಾ ಮೊಂನಾಂತ್ ತೊ ಮಾಗ್ಣೆ ಕರ್ತಾ ಲೊ ಜೆಜು ಹಾಂವ್ ಆಯ್ಲಾಂ ತುಕಾ ಮೆಳೊಂಕ್.
ಅಶೆಂ ತೊ ಸದಾಂ ಕರ್ತಾಲೊ.
ದೀಸ್ ಪಾಶಾರ್ ಜಾವ್ನ್ ವೊರ್ಸಾಂ ಧಾಂವ್ಲಿಂ.
ಎಕ್ ದೀಸ್ ತೊ ಮುನಿಸ್ ಘಡೀಸ್ ಮೊರ್ನಾ ತಣಿರ್ ಪಾವ್ಲೊ.
ತಾಚಾ ಬಾಯ್ಲೆನ್ ಫಿರ್ಗಜ್ ಪಾದ್ರಿಕ್ ಆಪೊನ್ವ್ ವಿಯಾತಿಕುಮ್ ಹಾಡುಂಕ್ ವಿನಂತಿ ಕೆಲಿ.
ಪಾದ್ರಿ ವಿಯಾತಿಕುಮ್ ಘೆವ್ನ್ ಭಿತರ್ ರಿಗ್ತಾನಾ ಆವಾಜ್ ಆಯ್ಲೊ9 ಜೊನಾ ಜೆಜು ಆಯ್ಲಾ ತುಕಾ ಮೆಳೊಂಕ್.
ಸದಾಂ ಜೊನಾ ಜೆಜುಕ್ ಮೆಳೊಂಕ್ ವೆತೊಲೊ.
ಆಜ್ ಜೆಜುಚ್ ತಾಕಾ ಮೆಳೊಂಕ್ ಆಯ್ಲೊ.
ಅಸಲೆಂ ಅಚರ್ಯೆಂ ಆಮ್ಚೆ ಥಂಯ್ ಜಾತಾ, ಜರ್ ಆಮ್ಚೊ ಭಾವಾಡ್ತ್ ತ್ಯಾ ಸಾದ್ಯಾ ಜೊನಾ ಬರಿಂ ಆಸಾತ್ ತರ್.
ಹರೆಕಾ ಯುವ್ಕರಿಸ್ತಾಂತ್ ಜೆಜು ಖರೊಚ್ ಹಾಜರ್ ಆಸ್ತಾ.
ತೊ ತಾಚಾ ಮೊಗಾಚಾ ಮುನ್ಶಾಂ ಬರಾಬರ್ ರಾವೊಂಕ್ ಆಶೆತಾ.
ದೆಕುನ್ ಆಮ್ಚಾ ಇಗರ್ಜಾನಿ ತಾಬೆರ್ನಾಕಲ್ ಆಸಾ ತಾಂತು ಜೆಜುಕ್ ದೊವ್ರಿತಾತ್.
ಆಮಿಂ ಜೆಜುಚಿ ಭೆಟ್ ಕರ್ತಾನಾ ಆಮ್ಚೊ ಭಾವಾಡ್ತ ಕಸೊ ಆಸ್ತಾ?
ಆಮಿಂ ಮಿಸಾವೆಳಾರ್ ಪುರ್ವಿತ್ ಹೊ ಆಮ್ಚಾ ಭಾವಾಡ್ತಾಚೊ ಘುಟ್ ಮುಣ್ ಸಾಂಗ್ತಾನಾ ಆಮಿಂ ಮ್ಹುಣ್ತಾಂವ್, ಜೆಜು ಮೆಲೊ ಜೆಜು ಜಿಂವೊಂತ್ ಜಾಲಾ ಜೆಜು ಪೊರ್ತ್ಯಾನ್ ಎತೊಲೊ.
ಹೆಂ ಸತ್ ಆಮ್ಚಾ ಕಾಳ್ಜಾನಿ ರೊಂಬೊನ್ ಗೆಲಾಂಗೀ ಯಾ ಆಮಿಂ ಹೆಂ ಭಾವಾಡ್ತಾಚೆಂ ಉಚ್ಚಾರಣ್ ಖಾಲಿ ಮಾಕಾ ಜಾಲ್ಲ್ಯಾಸೊವೊಯೆಕ್ ಲಾಗೊನ್ ಗೀ ಮ್ಹುಣ್ ಚಿಂತುನ್ ಪೊಳೊಂಚೊ ವೇಳ್ ಆಜ್.
ಆಮ್ಚೆಂ ಜಿವಿತ್ ಎಕ್ ಘುಟ ಜಾವ್ನಾಸಾ.
ತೇಂ ಆಮ್ಚಾ ಆವೊಯ್ ಬಾಪಾಯ್ಚಾ ಮೊಗಾನ್ ಉದೆಲಾಂ
ಜೆ ದಿಸಾ ತಾಣಿಂ ತಾಂಚೊ ಮೋಗ್ ಕೆಲೊಗೀ ತ್ಯಾ ಮೊಗಾಚಾ ಕರ್ನೆನ್ ಆಮ್ಚೊ ಜೀವ್ ಆಯ್ಲಾ.
ಜೆಜು ಸಾಂಗಾತಾ ಆಮಿಂ ಜರ್ ರಾವಾನ್ ತೊ ಆಮ್ಕಾಂ ಕೆದಾಳಾರ್ಯೀ ತಾಚಿ ಸಸಾಯ್ ದಿತಾ.
ತೊ ಮ್ಹುಣ್ತಾ ತುಮಿಂ ಮುಜೆಂ ಮಾಸ್ ಖೆಲ್ಲ್ಯಾ ಖೆರಿತ್ ಆನಿಂ ಮ್ಹುಜೆಂ ರಗಾತ್ ಪಿಯೆಲ್ಲ್ಯಾ ಖೆರಿತ್  ಸಾಲ್ವಾರ್ ಜಾಯ್ನಾತ್.
ತಾಣೆ ಇತ್ಲ್ಯಾ ಮೊಗಾನ್ ಹೆಂ ಆಮ್ಕಾಂ ದಿಲಾಂ.
ತೊ ಜಾಣಾ ಆಮಿಂ ಕಿತ್ಲೆ ಪಾವ್ಟಿಂ ತಾಚೆ ಥಾವ್ನ್ ಪೊಯ್ಸ್ ಸರ್ತಾಂವ್ ಪೂಣ್ ತೊ ಕೆದಿಂಚ್ ಆಮ್ಕಾಂ ಸಾಂಡಿನಾ.
ಆಮ್ಚಾ ದೆಶಾಂತ್ ಎದೊಳ್ ಮ್ಹುಣಾಸರ್ ಮ್ಹಾಲ್ಘಡ್ಯಾಂಕ್ ಮರ್ಯಾದ್ ದಿಂವ್ಚಿ ರಿವಾಜ್ ಉರ್ಲ್ಯಾ.
ಪೂಣ್ ಆತಾಂ ಆತಾಂ ಪಾಶ್ಚಾತ್ಯ ಪ್ರಭಾವ್ ಆಮ್ಚಾ ಯುವಾ ಜನಾಂಗಾಚೆರ್ ಪೊಡೊಂಕ್ ಸುರು ಜಾಲ್ಯಾ.
ಆಮ್ಚಿಂ ಕುಟ್ಮಾ ತುಟೊಂಕ್ ಲಾಗ್ಲ್ಯಾಂತ್.
ಆಮ್ಚಾ ಹ್ಯಾ ತ್ವರಿತ್ ಯುಗಾಂತ್ ಎಕಾ ಮೆಕಾಕ್ ಮೆಳೊಂಕ್ ವೇಳ್ ಮೆಳಾನಾ.
ತಶೆಂ ಸಂಬಂದ್ ಘಟ್ ಜಾಂವ್ಚಾ ಬದ್ಲಾಕ್ ಪೊಕೊಳ್ ಜಾತಾ.
ಶೆಯ್ನೆ ಶೆಯ್ನೆ ತೊ ಸಂಬಂದ್ ತುಟೊಂಕ್ ಸುರು ಜಾತಾ.
ತಾಚಿ ಖಬೊರ್ ಅಮ್ಕಾಂ ಮೆಳ್ತಾನಾ ವೇಳ್ ಚುಕೊನ್ ವೆತಾ.
ಆಮ್ಚಾ ಅದ್ಯಾತ್ಮಿಕ್ ಜಿವಿತಾಂತ್ ಆಮ್ಚಾ ಸಾಮಾಜಿ ಜಿವನಾಂಚೊ ಪ್ರಭಾವ್ ಪೊಡಾನಾಸ್ತಾನಾ ವೊಸಾನಾ.
ಆಮ್ಚಿಂ ಭುರ್ಗಿಂ ಬಾಳಾಂ ಪೊರ್ಗಾಂವಾನಿ ಕಾಮಾಕ್ ವೆತಾತ್.
ಘರ್ಚಾಂಚೊ ಮೋಗ್ ಆಸ್ತಾ ಜಾಲ್ಯಾರೀ ಕಾಮಾಚಾ ದಬಾವಾಕ್ ಲಾಗೊನ್ ತೊಯ್ ಉಣೆ ಜಾತಾ.
ಆನಿ ಅಖೆರೆಕ್ ಮೀಸ್, ಮಾಗ್ಣೆಂ ಉಣೆಂ ಜಾತಾ.
ಆಮಿಂ ಉಪ್ರಾಂತ್ ಆಮ್ಚೆರ್ ವಿಗ್ನಾ ಯೆಯ್ಲ್ಯಾ ವೆಳಾರ್ ಮಾಗ್ಣ್ಯಾ ಸಾಲಾಂಕ್ ರೆತಿರ್ ಮಂದಿರಾಂಕ್, ಪಾದ್ರಿ ಮಾದ್ರಿಂಕ್ ಮಾಗೊಂಕ್ ಸಾಂಗ್ತಾಂವ್.
ಪೂಣ್ ವೇಳ್ ಆಸ್ತಾನಾಂಚ್ ಜಾಗ್ರುತ್ ಜಾಯಾ ಮ್ಹುಣ್ ಆಮ್ಕಾಂ ಜೆಜು ತಾಚಾ ಉತ್ರಾನಿ ಸಾಂಗ್ತಾ.
ಆಮಿಂ ಜಾಗ್ರುತ್ಕಾಯೆನ್ ಚೀತ್ ದೀವ್ನ್ ಜೆಜುಚಿಂ ಉತ್ರಾಂ ಆಯ್ಚಾ ಮಿಸಾ ವೆಳಾರ್ ತಿನೀಂ ವಾಚ್ಪಾನಿ ಆಯ್ಕಾಯಾಂ.
ತೊಚ್ ಆಮ್ಕಾ ವಾಟ್ ದಾಕಯ್ತಾ.
ತೊಚ್ ಆಮ್ಚೊ ಆಧಾರ್ ಜಾತಾ.
ಆಮ್ಚೊ ಭಾವಾಡ್ತ್ ತೊಚ್ ಘಟ್ ಕರ್ತಾ.
ತುಮ್ಚಾ ಮೊಗಾಚೊ.
ಬಾಪ್ ಜುಜೆ ವಾಸ್ ಎಸ್.ವಿ.ಡಿ.