ಕ್ರೀಸ್ತ್ ರಾಯಾಚಾ ಯೆಣ್ಯಾಚೊ-ಆದ್ವೆಂತಾಚೊ ಚೊವ್ತೊ ಆಯ್ತಾರ್ 23-12-2012
ವಿಷಯ್: ಲ್ಹಾನ್ ಜಾಗ್ಗ್ಯಾ ಥಾವ್ನ್ ಜಲ್ಮಾತಾ ದೆವಾಚೊ ಪೂತ್.
ಮಿಕಾ ಪ್ರವಾದಿಚಾ ಫುಸ್ತಕಾಂತ್ಲೆಂ ಪೊಯ್ಲೆಂ ವಾಚಾಪ್ 5:1-4 ಬೆತ್ಲೆಮಾಂತ್ಲ್ಯಾ ರಾಯ್ ಕುಂವರಾ ಚೊ ಜಲ್ಮ್
ಹೆಬ್ರೆವಾಚಾ ಪತ್ರಾಂತ್ಲೆ ದುಸ್ರೆಂ ವಾಚಾಪ್: 10:5-10 ದೇವ್ ಆಮ್ಕಾಂ ಪಾತ್ಕಾಕ್ ಪಾಟ್ ಕರುಂಕ್ ಉಲೊ ದಿತಾ.
ಸಾಂ ಲುಕಾ ಚಾ ವಾಂಜೆಲಾಂತ್ಲೊ 1:39-44 ಮೊರಿ ಎಲಿಜಾಬೆತಿಕ್ ಭೆಟ್ ದಿತಾ.
ಪಾಟ್ಲ್ಯಾತೀನ್ ಹಪ್ತ್ಯಾನಿ ಆಮಿಂ ಸಾಂ ಲುಕಾಚಾ ವಾಂಜೆಲಾಂತ್ಲೆ ದೆವಾಚೆಂ ಉತಾರ್ ಆಯ್ಕಾಲಾಂ..
ಪೊಯ್ಲ್ಯಾ ಆಯ್ತಾರಾ ದೆವಾನ್ ಆಮ್ಕಾಂ ಜೆಜು ಚಾ ಮಹಿಮೆಭರಿತ್ ಜಿವಿತಾ ವಿಶಿಂ ಚಿಂತುಂಕ್ ಉಲೊ ದಿಲೊ..
ದುಸ್ರ್ಯಾ ಆಯ್ತಾರಾ ಆಮ್ಕಾಂ ಹಜಾರೊಂ ವೊರ್ಸಾಂ ಪಾಟಿಂ ವೊಸೊನ್ ಸಾಂ ಜುಂವಾಂವ್ ಬಾವ್ತಿಸ್ತಾ ಚಿ ವೊಳೊಕ್ ಕರ್ನ್ ದೀವ್ನ್ ತಾಣೆಂ ಲೊಕಾಕ್ ಪಾತ್ಕಾಂ ತ್ ಥಾವ್ನ್ ಪೊರ್ತೊಣೆ ಚೊ ಉಲೊ ದಿಲ್ಲೊ ಆಯ್ಕಾಲೊ.
ತಿಸ್ರ್ಯಾ ಆಯ್ತಾರಾ ಪಾತ್ಕಿ ಜಿಣಿ ಸಾಂಡುನ್ ಎಕಾ ನೊವ್ಯಾ ಜಿವಿತಾಚೆ ಆಶೆ ಕ್ ರಾಕೊನ್ ರಾಂವೊಕ್ ಆಮ್ಕಾಂ ದೇವ್ ಆಪೊಂಕ್ ಲಾಗ್ಲೊ.
ಚೊವ್ತ್ಯಾ ಆಮ್ಕಾಂ ಜೆಜುನ್ ಸರ್ಗ್ ಸೊಡ್ನ್ ಸಾದ್ಯಾ ಮುನ್ಶಾ ಜಿವಿತ್ ಘೆವ್ನ್ ಅಮ್ಕಾಂ ದೆವಾಚಾ ಜಿವಿತಾಚಿ ವೊಳೊಕ್ ಕರ್ನ್ ದೀಂವ್ಕ್ ತೊ ಆಯ್ಲಾ ಮುಳೆ ಸತ್ ಸಮ್ಜಯ್ತಾ.
ಜೆಜು ದೆವಾಚೊ ಪೂತ್ ಜಾವ್ನಾ ಸ್ಲೊಲೊ ಜಾಲ್ಯಾರೀ ತೊ ಎಕ್ ಸಾದೊ ಮುನಿಸ್ ಜಾವ್ನ್ ಆಮ್ಚೆ ಬರಿಂಚ್ ಮುನ್ಶಾ ಸಂಯ್ಬ್ ಘೆವ್ನ್ ಆಮ್ಚೆ ಮೊದೆಂ ಜಿಯೆವ್ನ್ ಆಮ್ಕಾಂ ತೊ ತಾರಣ್ ದಿತಾ.
ಆಯ್ಚಾ ದಿಸಾಚಾ ವಾಚ್ಪಾಂ ನಿ ಆಮಿಂ ಪೊಳೆತಾಂವ್ ಕಶೆಂ ಆಮಿಂ ಸತಾಚಿ ವಾಟ್ ಧರಿಜಯ್ ಮುಳೆಂ ಸತ್ ಶಿಕ್ತಾಂವ್
ಮೊರಿಯೆಕ್ ಖಬೊರ್ ಮೆಳ್ತಚ್ ತುರಂತ್ ತೀ ತಿಚೆ ಮಾವ್ಶೆ ಭಯ್ಣಿಚಾ ಕುಮ್ಕೆಕ್ ಭಾಯ್ರ್ ಸರ್ನ್ ಗೆಲಿ.
ಪೆಲ್ಯಾಚಿ ಸೆವಾ ಕರ್ಚಿ ಬೊರಿ ದೇಕ್ ಮೊರಿ ಆಮ್ಕಾಂ ತಿಚೆ ಹ್ಯಾ ಕರ್ನೆನ್ ಶಿಕಯ್ತಾ.
ಜುಂವಾಂವ್ ಬಾವ್ವ್ತಿಸ್ತ್ ಜೆಜುಚಾ ಮಾಯೆಚ್ಯಾ ಯೆಣ್ಯಾ ವೊರ್ವಿಂ ಜೆಜುಕ್ ಎಲಿಜಾಬೆತಿಚಾ ಉದರಿಂತ್ ವೊಳ್ಕಾತಾ ಆನಿಂ ಖುಶೆನ್ ಉಡ್ಕಾಣಾ ಘಾಲ್ತಾ.
ಜಶೆಂ ಜಶೆಂ ಕ್ರೀಸ್ತ್ ಯೆಣ್ಯಾ ಚೊ ವೇಳ್ ಲಾಗಿಂ ಎತಾ ಆಮಿಂ ಭಾಯ್ಲಿ ತಯಾರಾಯ್ ಭೊರಾನ್ ಕರುಂಕ್ ಲಾಗ್ತಾಂವ್.
ದೀಸ್ ಲಾಗಿಂ ಪಾವ್ತಾನಾ ವೊಡ್ ವೊಡ್ ಕಾರ್ಯಾಂಚಿ ತಯಾರಾಯ್ ಕರ್ಚೆಂ ಸ್ವಾಭಾವಿಕ್.
ಕಾರ್ಯಿಂ ತಯಾರಾಯ್ ಕರ್ಚಾ ಕಾರ್ಯಕರ್ತಾಂ ಮೊದೆಂ ಎಕ್ ನಮುನೆಚಿ ಉಮೆದ್ ಆನಿ ಅಸಮಂಜಸ್ ಆಸ್ತ್ಚೆಂ ಸ್ವಾಭಾವಿಕ್.
ತಯಾರಾಯೆಕ್ ಲಾಗೊನ್ ಕಿತ್ಲಿಶಿಂ ಮಿಟಿಂಗಾ ಕರಯ್ತಾತ್, ಕಿತ್ಲಿ ಸರ್ಭರಾಯ್ ಜಾಯ್ತ್ ಆಸ್ತಾ.
ಪೂಣ್ ಭಾಯ್ಲಿ ತಯಾರಾಯೆ ಸಾಂಗಾತಾ ಮೊನಾಂಚಿ ತಯಾರಾಯ್ ಖಂಡಿತ್ ಕರ್ಚೆಂ ಆವಶ್ಯಕ್.
ಪೂಣ್ ಆಮಿಂ ಪೊಳೆಲಾಂ ಆಧುನಿಕ್ ಕಾಲಾರ್ ಜೆಜುಚಾ ಜಲ್ಮಾ ವೆಳಾರ್ ಕ್ರಿಸ್ಮಸಾ ಚಿ ತಯಾರಾಯ್ ಆಂಗ್ಡಿನಿ ಚಡ್ ದಿಸ್ತಾ.
ಆಮಿಂ ಆಮ್ಚಾ ಭುರ್ಗ್ಯಾಂಬಾಳಾಂಕ್ ಗಿಫ್ಟ್ ದೀಂವ್ಕ್ ಚಡ್ ತಯಾರಾಯ್ ಕರ್ತಾಂವ್ ನಂಯ್?
ತ್ಯಾ ಪಾಸೊತ್ ಆಮಿಂ ಭಾವಾಡ್ತ್ಯಾನಿ ಆಮ್ಚೆಂ ನತಾಲಾಂ ಫೆಸ್ತ್ ಜೆಜುಕ್ ಆಮ್ಚಾ ಕಾಳ್ಜಾನಿಂ ಜಾಗೊ ದೀಂವ್ಕ್ ತಯಾರ್ ಕರಿಜಯ್.
ಕಿತ್ಲೆಶಾ ಪಾವ್ಟಿಂ ಅಸಲಿ ತಯಾರಾಯ್ ಕರುಂಕ್ ಆಮ್ಕಾಂ ಧಯ್ರ್ ಮೆಳಾನಾ ಆನಿ ವೇಳೀ ಆಸಾನಾ.
ಅಸಲಿ ತಯಾರಾಯ್ ಆಮಿಂ ಕರಿನ್ ಜಾಲ್ಯಾರ್ ಲೊಕ್ ಮುಜೆ ವಿಶೆಂತ್ ಕಿತೆಂ ಚಿಂತಿತ್ ಮುಳಿ ಭಿರಾಂತ್ ಮಾಕಾ ಮೊಸ್ತ್ ಪಾವ್ಟಿಂ ಧೊಸ್ತಾ.
ದೆವಾಚೊ ಪೂತ್ ಆಮ್ಚೆ ಮೊದೆಂ ಜಿಯೆಂವ್ಕ್ ಎತಾನಾ ತೊ ಆಮ್ಕಾಂ ಖಂಡಿತ್ ತಾಚೆಂ ಬೊಳ್ ದಿತಾ.
ತೊ ಮುಣ್ತಾ ಹಾಂವ್ ಸದಾಂಚ್ ತುಮ್ಚೆ ಸಾಂಗಾತಾ ಆಸಾಂ. ಭಿಯೆನಾಕಾತ್.
ಆಮ್ಚಾ ಸದಾಂಚಾ ಪಯ್ಣಾಂರ್ ತೊ ಆಮ್ಚೆ ಸಾಂಗಾತಾ ಪಯ್ಣ್ ಕರ್ನ್ ಆಮ್ಕಾಂ ಸದಾಂಚ್ ತಾಚಿ ಕುಮೊಕ್ ದಿತಾ.
ಆಯ್ಚಾ ಯುಗಾಂತ್ ಆಮ್ಕಾಂ ಸರ್ವ್ ವೊಸ್ತು ತತ್ಕಾಲ್ ಮೆಳ್ತಾತ್.
ಮಾಕಾಂ ಮುಜಾ ಜಿವಿತಾಂತ್ ಉಪಯೊಗ್ ಕರುಂಕ್ ಜಾಯ್ ತಿ ವೊಸ್ತ್ ತುರಂತ್ ಮೆಳ್ತಾ.
ತಿಚೊ ತತ್ಕಾಲ್ ಉಪಯೊಗ್ ಕರ್ ಆನಿಂ ಉಡಯ್ ಮುಣ್ತಾ ಆತಾಂಚೊ ಹೊ ನವೊ ಕಾಲ್.
ಮೊರಿ ಎಲಿಜಾಬೆತಿಕ್ ಕುಮೊಕ್ ಕರುಂಕ್ ಉಟಾಉಟಿಂ ಚಲೊನ್ ಗೆಲಿ.
ಆತಾಂಚಾ ಕಾಲಾರ್ ಅಶೆಂ ಕರುಂಕ್ ಕೊಣಾ ಲಾಗಿಂ ವೇಳ್ ಆಸಾ?
ಆಮಿಂ ಚಡ್ ಆನಿಂ ಚಡ್ ಜೊಡುಂಕ್ ಲಾಗ್ತಾಂವ್.
ಆಮ್ಚೆ ದೀಸ್ ಬೊರೆ ಜಾಂವ್ದಿತ್ ಮುಣ್ ಆಮಿಂ ಆಶೆವ್ನ್ ಆಸ್ತಾಂವ್.
ನತಾಲಾಂಚಿ ಸೊಭಾಯ್ ಆಮಿಂ ಪೊಳೆತಾಂವ್.
ಸಗ್ಳ್ಯಾನಿತ್ಲ್ಯಾನ್ ಆಮಿಂ ಭಾಯ್ಲಿ ತಯಾರಾಯ್ ದೆಕ್ತಾಂವ್.
ಆಧುನಿಕ್ ಮಾದ್ಯಮಾಂ ನತಾಲಾಂಚಾ ತಯಾರಾಯೆಚಿ ಭಾಯ್ಲಿ ಆಡಂಭರಾಂ ಆಮ್ಕಾಂ ದಾಕಯ್ತಾ.
ತಿಚೆ ಕುಶಿಕ್ ಆಮಿಂ ಆಕರ್ಶಿತ್ ಜಾತಾಂವ್ ಆನಿಂ ಆಮ್ಚಾ ಭಿತರ್ಲಿ ಕಾಳ್ಜಾಚಿ ತಯಾರಾಯ್ ಕರುಂಕ್ ಆಮ್ಕಾಂ ಪಾವ್ಟ್ ಮೆಳಾನಾ.
ಯಾ ಆಯ್ತಾರಾ ಆಮ್ಕಾಂ ಜೆಜು ತಾಚಾ ಬೊಳಾದಿಕ್ ಮೊಗಾಚಾ ಉತ್ರಾನಿಂ ಆಪೊನ್ ತಾಚೊ ಪಾಟ್ಲಾವ್ ಕರುಂಕ್ ಸಾಂಗ್ತಾ.
ಹೆಂ ಮಿಸಾಂವ್ ಆಮ್ಕಾಂ ಹ್ಯಾ ನಾತಾಲಾಂ ಫೆಸ್ತಾಂತ್ ವಾಂಟೊ ಘೆಂವ್ಕ್ ತಾಚಾ ಕುರ್ಪೆನ್ ಭೊರುಂದಿ.
ಕುಮ್ಸಾರ್ ಜಾವ್ನ್ ಆಮಿಂ ಜೆಜುಕ್ ಆಮ್ಚಾ ಕಾಳ್ಜಾಚಾ ಗರ್ದಾನಾಂಚಾ ಗೊಟ್ಯಾಂತ್ ಜಾಗೊದಿಂವ್ಯಾ.
ಆಮಿಂ ಹೆಂ ನತಾಲಾಂ ಫೆಸ್ತ್ ಆಮ್ಚಾ ಜಿವಿತಾಂತ್ ಎಂವ್ಚ್ಯಾ ನಿರ್ಗತಿಕ್ ಲೊಕಾಚಿ ಸೆವಾ ಕರ್ಚಾಂತ್ ಖರ್ಚುನ್ ಎಕ್ ನೊಂವೆ ಬೋಳ್ ಮೆಳಾಶೆಂ ಕರ್ಯಾಂ.
ಆನಿಂ ದೊನಂಚ್ ದಿಸಾನಿಂ ನತಾಲಾಂ ಫೆಸ್ತ್ ಆಚರ್ಸಿತಾನಾಂ ಆಮಿಂ ಖುಶೆನ್ ತಾಚಾ ಮೊಗಾಕ್ ಖಾಲ್ತಿಮಾನ್ ಘಾಲ್ಯಾಂ
ಜಾಂವ್ದಿ ಹೊ ತಯಾರಾಯೆಚೊ ವೇಳ್ ಆಮ್ಕಾಂ ಎಕ್ ನೊಂವೆ ಜಿವಿತ್ ದಿಂವ್ಚೊ.
ತುಮ್ಚಾ ಮೊಗಾಚೊ, ದೆಯ್ವಿಕ್ ಉಲ್ಯಾಚೊ ಸಾಂದೊ
ಬಾಪ್ ಜುಜೆ ವಾಸ್ ಎಸ್.ವಿ.ಡಿ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ