ಸಾಧಾರಣ್ ವೊರ್ಸಾಚೊ ಚೊವ್ತೊ ಆಯ್ತಾರ್: 02-02-2014 ಜೆಜುಕ್ ತೆಂಪ್ಲಾಂತ್ ಭೆಟಯ್ತಾತ್:

ಸಾಧಾರಣ್ ವೊರ್ಸಾಚೊ ಚೊವ್ತೊ ಆಯ್ತಾರ್: 02-02-2014 ಜೆಜುಕ್ ತೆಂಪ್ಲಾಂತ್ ಭೆಟಯ್ತಾತ್: ವಿಷಯ್:ಉಜ್ವಾಡಾಚೊ ರಾಯ್. ಮಾಲಾಕಿ ಪ್ರವಾದ್ಯಾಚಾ ಪುಸ್ತಕಾಂತ್ಲೆಂ ಪೊಯ್ಲೆಂ ವಾಚಾಪ್ 3:1-4 ಪಾತ್ಕಾಂತ್ಲಿ ಸುಟ್ಕಾ. ಹೆಬ್ರೆವಾಂಚಾ ಪತ್ರಾಂತ್ಲೆ ದುಸ್ರೆಂ ವಾಚಾಪ್ 2:14-18: ಜೆಜು ಖ್ಹುಶೆನ್ ಮುನ್ಶಾಸಂಯ್ಬ್ ಆಪ್ಣಾಯ್ತಾ. ಸಾಂ ಲುಕಾಚೊ ವಾಂಜೆಲ್: 2:22-40 ಜುಜೆ ಆನಿ ಮೊರಿ ಜೆಜುಕ್ ತೆಂಪ್ಲಾಂತ್ ಭೆಟಯ್ತಾತ್. ಅಂವ್ದು ಜೆಜುಚಿ ತೆಂಪ್ಲಾ ಭೆಟೊಣೆಚಿ ಪರಬ್ ಆಯ್ತಾರಾ ಪೊಡ್ತಾ. ಯಾ ಪರ್ಬೆ ವೆಳಾರ್ ಹರೆಕಾ ಇಗರ್ಜೆಂತ್ ವಾತಿ ಬೆಂಜಾರ್ ಕರ್ತಾತ್. ವಾತಿ ಆಮ್ಕಾಂ ಉಜ್ವಾಡ್ ದಿತಾತ್. ಆಮಿಂ ಲ್ಹಾನ್ ಆಸ್ತಾನಾ ಹ್ಯೊ ವಾತಿ ಆಮ್ಚಾ ಘರಾಂತ್ ಅನ್ವಾರಾಂ ಆಯ್ಲ್ಯಾ ವೆಳಾರ್ ಪೆಟಯ್ತೆಲ್ಯಾಂವ್. ಸಾಮಾನ್ಯ್ ರಿತಿನ್ ಹರೆಕ್ ವಿಶ್ವಾಸಿ ಅಸಲಿಂ ಲಿತುರ್ಜಿಕ್ ಕಾಯಾನಿ ಬೆಂಜಾರ್ ಕೆಲ್ಲ್ಯೊ ವೊಸ್ತು ತಾಂಚಾ ಜಿವನಾಂತ್ ಉಪಯೊಗಾಕ್ ಹಾಡ್ತಾತ್. ಮುನ್ಶಾ ಸಂಯ್ಬ್ ಘೆತಚ್ ಸಾಮಾನ್ಯ್ ರಿತಿನ್ ಮುನ್ಶಾಚಾ ಜಿವಿತಾಂತ್ ಜಾಂವ್ಚಿ ಹರೆಕ್ ಕಾರ್ಯಿಂ ತಾಣೆಂ ತಾಚಾ ಜಿವಿತಾಂತ್ ಆದಾರ್ಲಿಂ. ಖಾಲ್ತೊ ಜಾವ್ನ್ ತೊ ಯಾ ಸಂಸಾರಾಂತ್ ಜಲ್ಮಾಲೊ. ತೊ ದೇವ ಜಾಲ್ಯಾರೀ ತಾಣೆಂ ಕಸಲೆಂಯ್ ಯಾ ಜಿವನಾಂತ್ ಆಪ್ಲ್ಯಾ ಸಂಯ್ಬಾ ತಾಕಿತ್ ಜಾಯ್ ಮುಣುಂಕ್ ನಾಂ. ತಾಣೆಂ ಸಂಪೋರ್ಣ್ ರಿತಿನ್ ಸಾಧಾರಣ್ ಮುನ್ಶಾಂ ಬರಿಂಚ್ ಆಪ್ಲೆಂ ಜಿವಿತ್ ಸಾರ್ಲೆಂ. ತೊ ತಾಚಾ ಆವೊಯ್ ಮೊರಿ ಆನಿ ಬಾಪೊಯ್ ಜುಜೆ ಸಾಂಗಾತಾ ಸದಾಂಚಾ ಜಿವಿತಾಂತ್ ಮೆತರ್ ಜಾಲೊ. ತಾಚೊ ಬಾಪೊಯ್ ಸುತಾರ್ ಜಾಲ್ಲ್ಯಾನ್ ಎಕಾ ಸುತಾರ್ಯಾಚೆಂ ಜಿವಿತ್ ತೊ ಜಿಯೆಲೊ. ಎಕಾ ಜುದೆವಾ ಬರಿಂ ಸರ್ವ್ ರಿತಿ ರಿವಾಜಿಂಕ್ ತೊ ಖಾಲ್ತೊ ಜಾಲೊ. ದೆವ್ ಮುನಿಸ್ ಜಾತಾ ತೊ ಎಕ್ ಗೂಂಡ್ ಮಿಸ್ತೆರ್ ಜಾವ್ನಾಸಾ. ಇಗರ್ಜ್ ಮಾತಾ ಆಮ್ಕಾಂ ತಾಚಾ ಪರ್ಬೆನ್ ಹೊ ಮಿಸ್ತೆರ್ ಸುಟೊಂಕ್ ಕುಮೊಕ್ ಕರ್ತಾ. ಆಮ್ಕಾಂ ಆಮಿಂ ಲ್ಹಾನ್ ಆಸ್ತಾನಾ ಆಮ್ಚಾ ಆವೊಯ್ ಬಾಪಾಯ್ನ್ ಇಗರ್ಜೆಂತ್ ವೆಲಾಂ ತಶೆಂಚ್ ಆಜ್ ಜೆಜುಕ್ ತೆಂಪ್ಲಾಂತ್ ಭೆಟೊಂಕ್ ಹೊರ್ತಾನಾ ತಾಕಾ ಥಂಯ್ ದೊಗ್ ಪ್ರೊಫೆತ್ ಮೆಳ್ತಾತ್. ಸಿಮಿಂಯಾಂವ್ ಆನಿಂ ಆನ್ನಾ., ಹಿಂ ದೊಗಾಂ ತೆಂಪ್ಲಾಂತ್ ಕಂಯ್ ಜೆಜು ಎತಾ ಮ್ಹುಣ್ ರಾಕೊನ್ ಆಸ್ಲೆಲಿಂ. ತಾಂಚೊ ವಾವ್ರ್ ಜೆಜು ತೆಂಪ್ಲಾಂತ್ ಪಾವ್ತಚ್ ಮುಗ್ದಾಲೊ. ತಾಂಣಿಂ ಜೆಜುಕ್ ತಕ್ಷಣ್ ವೊಳ್ಕೊನ್ ತಾಚೆ ವಿಶೆಂತ್ ಭವಿಶ್ಯವಾಣಿ ಕೆಲಿ. ಜೆಜು ಮೊಸ್ತ್ ಲೊಕಾಕ್ ಸುಟ್ಕೆಚಿ ಆನಿಂ ಸಬಾರಾಂಕ್ ಪೊಡ್ನೆಚಿ ವಾಟ್ ಜಾತೊಲೊ. ಜೆಜು ಧರ್ಮಾನ್ ಮೊರಿಯೆಚೆಂ ಕಾಳಿಜ್ ಎಕಾ ತಲ್ವಾರಿನ್ ಫಾಪ್ಸಾತೆಲೆಂ ಜೆಜುಕ್ ಪೊಳೊನ್ ಸಿಮಿಯಾಂವ್ ತ್ರಪ್ತ್ ಜಾವ್ನ್ ಮೊರೊಂಕ್ ಮಾಗಾಲಾಗ್ಲೊ. ಪ್ರವಾದಿಣ್ ಆನಾ ಜೆಜುಕ್ ರಾಕೊನ್ ಮೊಸ್ತ್ ವೊರ್ಸಾಂ ಉಪಾಸ್ ಆನಿ ಮಾಗ್ಣ್ಯಾಂನ್ ಖರ್ಚಿತಾಲಿ.. ಜೆಜುಕ್ ಪೊಳೊನ್ ತಿ ಸಂತೊಸಾನ್ ಗದ್ಗತ್ ಜಾಲಿ. ಮೊರಿಯೆನ್ ಪ್ರವಾದಿ ಸಿಮಿಂಯಾವ್ಚಿಂ ಉತ್ರಾಂ ಆನಿ ಆನ್ನಾಚಿಂ ಭೊಗ್ಣಾ ಆಪ್ಲ್ಯಾ ಕಾಳ್ಜಾಂತ್ ಜಾಗೊ ಕರ್ನ್ ಘೆತ್ಲಿಂ.. ಉದೆಂತೆಚಾ ಇಗರ್ಜಾನಿ ಹೆಂ ಫೆಸ್ತ್ ಚೊವ್ತ್ಯಾ ಶತಮಾನಾಂತ್ ಆಚರ್ಸಿತೆಲೆ. ರೊಮಿ ಇಗರ್ಜಾನಿ ಹೆಂ ಫೆಸ್ತ್ ಸಾತ್ವಾ ಶತಮಾಂನಾಂತ್ ಆಚರ್ಸುಂಕ್ ಸುರು ಕೆಲೆಂ. ಹೆಂ ಫೆಸ್ತ ಉಜ್ವಾಡಾಚೆಂ ಫೆಸ್ತ್. ಸಿಮಿಯಾಂವ್ ಪ್ರವಾದ್ಯಾನ್ ಜೆಜುಕ್ ಮೊಸ್ತ್ ಲೊಕಾಚೊ ಉಜ್ವಾಡ್ ಜಾತೊಲೊ ಮ್ಹುಣ್ ಸಾಂಗ್ಲೆಂ ಜೆಜು ಮೊಸ್ತ್ ಜಣಾಂಕ್ ಭಾವಾಡ್ತಾಚೊ ಉಜ್ವಾಡ್ ಹಾಡುಂಕ್ ಪಾವ್ಲೊ.. ಹರೆಕ್ ವಾತ್ ಆಮ್ಕಾಂ ಉಜ್ವಾಡ್ ದೀವ್ನ್ ಆಮ್ಚೆಂ ಜಿವನ್ ಪ್ರಕಾಸಾನ್ ಭೊರ್ತಾ. ಜೆಜುಕ್ ತೆಂಪ್ಲಾಂತ್ ಭೆಟೊಂಚೆ ಫೆಸ್ತ್ ಆಮ್ಕಾಂ ಉಜ್ವಾಡಾಚೊ ಶೆವೊಟ್ ದೀಂವ್. ಸಾಂ ಆರ್ನೊಲ್ಡ್ ಜಾನ್ಸನ್ ದೆಯ್ವಿಕ್ ಸಭೆಚೊ ಘಡ್ಣಾ ರಾಚೆಂ ಮಾಗ್ಣೆಂ ಜಾವ್ನಾಸ್ಲೆಲೆಂ;:"ಸೊಬ್ದಾಚಾ ಉಜ್ವಾಡಾನ್ ಪಾತ್ಕಾಚೊ ಅಂದ್ಕಾರ್ ಪೊಯ್ಸ್ ಸರೊಂದಿ. ದೆವಾಚೆಂ ಕಾಳಿಜ್ ಮುನ್ಶಾಚಾ ಕಾಳ್ಜಾನಿ ರಜ್ವೊಟ್ ಕರುಂದಿ." ಆಯ್ಚಾ ತೆಂಪ್ಲಾ ಭೆಟೊಣೆ ಚಾ ಫೆಸ್ತಾ ದಿಸಾ ಹೆಂ ಮಾಗ್ಣೆಂ ಆಮಾಂ ಸಮೆಸ್ತಾಂಚೆ ಜಾಂವ್. ಆಮ್ಕಾಂ ಉಜ್ವಾಡಾಚೊ ಘುರ್ತ್ ಜೆಜು ಮೆಳ್ಳಾ. ತಾಣೆಂ ಆಮ್ಕಾಂ ಭಾವಾಡ್ತಾಂನ್ ಭೊರ್ನ್ ಆಮ್ಚೊ ಭಾವಾಡ್ತ್ ಜಿಯೆಂವ್ಕ್ ಸಾಂಗ್ಲಾ. ಹರೆಕ್ ಕ್ರೀಸ್ತ್ ಪ್ರಸಾದ್ ಆಮ್ಕಾಂ ನೊವೊ ಜೀವ್ ದಿತಾ. ಆಯ್ಚ್ಯೊ ಹ್ಯೊ ವಾತಿ ಆನಿ ಹೆಂ ಸಗ್ಳೆಂ ಕಾರ್ಯೆಂ ಆಮ್ಕಾಂ ಆಮ್ಚಾ ಭಾವಾಡ್ತಾಂತ್ ಥಿರ್ ಕರುಂದಿ. ತುಮ್ಚಾ ಮೊಗಾಚೊ, ದೆಯ್ವಿಕ್ ಉಲ್ಯಾಚೊ, ಸಾಂದೊ, ಬಾಪ್ ಜುಜೆ ವಾಸ್ ಎಸ್.ವಿ.ಡಿ.